ShQO: Jańbyr jaýady degen boljam taǵy da sý basý qaýpin týdyrdy
ÓSKEMEN. QazAqparat - Óskemenniń JMK, №19, 20 shaǵyn aýdandary endi Sheshek asýynan aqqan sýdyń astynda qalmaıtyn boldy. Oblys ákimi Danıal Ahmetov Sátpaev dańǵylyn boılaı qazylǵan aryq-bóget júıesin ózi baryp tekserdi, dep habarlaıdy QazAqparat tilshisi.
«Qazgıdromet» mekemesi Shyǵysta osy aptada da tasqyn qaýpi saqtalatynyn eskertip otyr. 20-21 naýryzda jyly temperatýra saqtalyp, jańbyr jaýýy saldarynan sý basý qaýpi týýy múmkin. Osyǵan deıingi mezgilsiz nóser oblys ortalyǵyndaǵy negizgi dańǵyldardyń birin kólkigen sýǵa toltyryp, erteńinde jarty kún boıy keptelis týdyrǵan bolatyn. Oblystyń ákimi Danıal Ahmetov buǵan aýdannyń ınjenerlik syzbasy durys jasalmaýy sebepker bolǵanyn aıtady.
Ákimniń aıtýynsha, tekserý kezinde Mıhaelıs sııaqty kóshelerdiń sýaǵarlary nóser sýyn der kezinde aǵyzyp áketýge qaýqarsyz ekenin, al Krasın kentindegi aryqtar qoqys pen qaldyqtan tazartylmaǵanyn kórsetken.
«4 kúnniń ishinde barlyq sý joldary arshyldy. Bul sharýa baıaǵyda istelýi kerek edi. Aryqty qoqystan tazartý sııaqty jumystar kúndelikti istelýi tıis. Kez kelgen jobany qolǵa almas buryn qalanyń ınjenerlik syzbasyn basshylyqqa alý kerek. Kún saıyn aýa temperatýrasy jylynyp keledi. Atqarylǵan sharýanyń arqasynda ótkendegideı sý jaıylmaıdy» - dedi Danıal Ahmetov.
Sheshek asýynan aqqan sý jan-jaqqa jaıylmas úshin 900 metr qubyr tóseldi. Al Sátpaev daǵylynyń 1333 metr boıyna tereńdigi 2 metrden asatyn aryq qazyldy.
Kommýnaldyq qyzmet mamandary táýlik saıyn qaladan 65 myń tekshe metr qar shyǵarýda. Al tótenshe jaǵdaı qyzmetkerleri sý basý qaýpi bar aýdandarda úı-úıdi aralap, saqtyq sharalary kórsetilgen eskertpe paraqtar taratýda.
Jaǵdaıdy jer tońynyń bir metrden asyp ketýi qıyndatyp otyr. Erigen qar sýy men mezgilsiz jańbyr sýy sol tońnyń betimen júrip, eldiń mazasyn taǵy alýy múmkin. Sondyqtan, qutqarýshylar ár úı ıesi aýladaǵy Tasqyn týraly habardy der kezinde berý úshin oblys boıynsha 112 jáne 138 nómirleri táýliktik rejimde jumys istep tur.
