ShQO ustazdary qashyqtan oqytý formatyna daıyn
ÓSKEMEN. QazAqparat – Shyǵys Qazaqstan oblysynyń ustazdary birinshi synyp oqýshylarymen qashyqtan tanysady, dep habarlaıdy QazAqparat tilshisi. Bıyl saltanatty túrde alǵashqy qońyraý soǵylmasa da, bastaýysh synyp muǵalimi Dınara Jamanbalınova jańa oqý jylyna ádettegideı daıyndalmaq. Ol oqýshylarmen qashyqtan tanysyp, beıneqońyraý arqyly til tabysqysy keledi.
«Oqýshylardyń tizimin aldym. Ár balanyń qaı balabaqshaǵa barǵanyn jáne kimniń qandaı qyzyǵýshylyǵy barymen tanystym. Sonymen qatar balǵyndardyń osy kúnge deıin qol jetkizgen jetistikterin qarap, jańa laıfhak oılap taptym. Laıfhak boıynsha ár balanyń aty-jónin fotosýretine jazyp qoıdym. Osylaısha beıneqońyraý arqyly tildesken sátte ár balanyń esimin ataımyn. Bul jaı nárse bolyp kóringenimen, birinshi synyp tabaldyryǵyn attaǵaly turǵan búldirshin úshin óte mańyzdy», - deıdi Dınara Jamanbalınova.
Birinshi synypqa baratyn balalardyń bári úı jaǵdaıynda bilim almaıdy. Ata-analardyń ótinishi boıynsha «kezekshi synyptar» jumys istemek. Onda 15 baladan artyq qabyldanbaıdy. Mektepte barlyq qaýipsizdik sharalary saqtalady. Qazir pedagogter onlaın rejımnen bólek, shtattyq rejımde bilim berý úshin sabaq kestesin yńǵaılastyrýda.
«Tórtinshi toqsanmen salystyrǵanda, osy joly mektep ujymy men ákimshiligine qashyqtan sabaq berýge daıyndalýǵa ýaqyt boldy. Bıylǵy oqý jylynda mektepke jóndeý jumystaryn júrgizip, jıhazdar men tehnıkalardy aýystyryp qana qoımaı, jańa oqytý júıesin pysyqtap úlgerdik. Jaz boıy pedagogtar vebınarlarǵa, trenıngerge, konferentsııalarǵa qatysyp, bilimderin shyńdady. Barlyǵy indet kezindegi durys oqytýdyń mańyzy zor ekenin bir kisideı túsinedi», - dedi Daryndy balalarǵa arnalǵan mamandandyrylǵan valeologııalyq mektep dırektory Natalıa Ahaeva.
Endi kitap pen dápterdiń ornyna oqýshylar úshin smartfon men kompıýterdiń bolýy óte mańyzdy. Muǵalimderdiń kómegi arqyly balalar arnaıy baǵdarlamany jazyp, sol boıynsha úı tapsyrmasyn oryndap, bilim alady. Tapsyrmany durys oryndaýdan bólek, dedlaındy saqtaý mańyzdy. Árbir sabaq boıynsha berilgen tapsyrmany oryndaýǵa reglament belgilenedi. Keıin sol boıynsha balalarǵa baǵa qoıylady. Sondyqtan qashyqtan oqý barysynda bosańsýǵa bolmaıdy.
Mektep psıhology Marına Zajıgınanyń aıtýynsha, balanyń baqylaýsyz qalyp, bosańsýyna jol bermeı, onyń oqýǵa degen jaýapkershiligin arttyrý kerek.
«Synyptyń ortaq chatynda árbir balamen jeke sóılesý qajet. Balalar saǵat 8.15-te baılanysqa shyǵýy tıis. Onlaın sabaq barysynda árbir balamen jumys júrgiziledi. Eger oqýshy pándi oqytý kezinde barlyǵyn túsinse, + belgisin qoıý tıis. Bul balalarǵa olardyń árdaıym baqylaýda ekenin uǵynýǵa múmkindik beredi», - dedi Marına Zajıgına.
