ShQO: Úrjarlyq oqýshylar polıetılendi paketterdi ekosómkelerge almastyryp jatyr
ÚRJAR. QazAqparat - Shyǵys Qazaqstan oblysy Úrjar aýdany ortalyǵyndaǵy І.Jansúgirov atyndaǵy orta mektep oqýshylary aýdan halqyn polıetılendi paketten bas tartýǵa shaqyrdy. Osy maqsatta olar «Bala qolymen» atty ekologııalyq naýqanyn uıymdastyryp, turǵyndardy óz qoldarymen matadan tikken ekosómkelerdi ustaýǵa úndeýde. Bul týraly osy aktsııanyń moderatory, І.Jansúgirov atyndaǵy orta mektebiniń geografııa pániniń muǵalimi Gúlsim Tumabaeva málim etti, dep habarlaıdy QazAqparat tilshisi.
Búgingi kúni І.Jansúgirov atyndaǵy orta mekteptiń 10 «a» synyp oqýshylary Ásem Sandybaeva, Kámshat Qusmanova, Mılana Qusaıynova, Dına Nurolla «Aq nıet» tobyn quryp, tehnologııa pániniń muǵalimi Vera Berkovamen matadan tigilgen birneshe ekosómkelerdi tigip, daıyndap qoıǵan.
«Polıetılen pakettiń báıgesi ári ketse - jarty saǵat, tez jyrtylyp qalady, biraq qoqys kúıinde tez shirip ketpeı, ondaǵan jyl jata beredi. ıAǵnı ydyraý ýaqyty 100 jyldan 500 jylǵa deıin merzimdi qamtıdy. Qazirgi kúni, 40-qa jýyq shetelderde (Eýropalyq odaq elderi, Avstralııa, Sıngapýr, Bangladesh jáne basqa da) polıetılendi paketterdiń aınalymyn tómendetip nemese qoldanýǵa tyıym salǵan. Búgingi kúni oqýshylarymyz jıyrmaǵa jýyq ekosómkelerdi tigip qoıdy. Sómkelerdi ádemi órnektermen áshekeılep, «Anashyma», «Ájemdiki» degen jazýlar jazyp, «Baqyt aǵashy» sýretterin salǵan. Biz aýdandaǵy barlyq mektepterge jumystarymyzdy kórsetip, úlken kezdesý uıymdastyrmaqshymyz»,-deıdi aktsııanyń moderatory Gúlsim Tumabaeva.
Aıta keteıik, qazirgi kezde aýdan ortalyǵyndaǵy barlyq bilim ordalarynyń mektep oqýshylary osy kezdesýge ekosómkelerdi tigý ústinde.
