ShQO: Úrjardan Astanaǵa tikeleı áýe reısi qaıta jandanady
ÚRJAR. QazAqparat - Erteń Shyǵys Qazaqstan oblysy Úrjar aýdanynan Astanaǵa qatynaıtyn áýe reısi qaıta iske qosylady. Bul baǵytta alǵash ret ushaq qatynasy byltyr ashylǵan bolatyn. Al qysqy ýaqytta jumysy toqtatylǵan edi, dep habarlaıdy QazAqparat tilshisi.
Sonymen birge erteń Úrjar-Almaty reısi de ashylady. Ol jóninde aýdandyq sáýlet, qurylys, TKSh, jolaýshy kóligi jáne avtomobıl joldary bólimi habarlady.
Endi shalǵaıdaǵy aýdan halqy elordaǵa eki-aq saǵatta jetedi. Jolaýshylarǵa 48 oryndyq AN-24 ushaqtary qyzmet etedi. Ázirge ushaq Astanaǵa aptasyna 2 márte qatynaıdy. Alakólde demalys maýsymy bastalǵan kezde qosymsha reıster ashylmaq. Munyń bári aımaqtaǵy týrızmdi damytyp, Alakólge keletin saıahatshylar sanyn eseleýge jol ashady.
Buǵan deıin aýdan ortalyǵynan Semeı, Óskemen qalalaryna ǵana áýe qatynasy bar edi.
Aıta keteıik, ótken jyly aýdanda alǵash ret Úrjar-Astana reısi ashylyp, úrjarlyqtar EKSPO kórmesin baryp tamashalaǵan edi. Al qysqy ýaqytta bul baǵyttaǵy ushaq qatynasy qyzmetin toqtatady.
«Astana men Almaty reısi respýblıkalyq bıýdjetten, al Semeı, Óskemen oblystyq bıýdjetten tólenedi. Semeı men Óskemenge bılet baǵasy 10 myń teńge. Astanaǵa 19500 teńge jáne Almatyǵa 16 myń teńgemen jetýge bolady», - deıdi Úrjar áýejaıynyń komendanty Bolat Bektemirov.
