ShQO: Úrjarda tós qaǵysyp, tilek aıtysqan dýmandy Naýryz ótti

ÚRJAR. QazAqparat - Eýrazııanyń kóp bóligi toılaıtyn, Ortalyq Azııa halqy úshin jyl basy sanalatyn Naýryz merekesin Úrjar jurtshylyǵy erekshe kóńil kúıde atap ótti, dep habarlaıdy QazAqparat tilshisi.

(foto)

Búgingi kún de shýaqty nuryn shashyp, úrjarlyqtardy, qonaqtardy qýanyshqa bóledi. Aýdannyń ortalyq alańynda ótkizilgen aıshyqty Naýryz meıramyn tamashalaýshylar erekshe áser aldy. Aýdandyq mádenıet úıiniń ónerpazdarynyń oryndaýyndaǵy teatrlandyrylǵan qoıylym tipten, Naýryz merekesiniń kórkin kirgizdi.

 

Toıǵa jınalǵan qaýymdy aýdan ákimi Serik Zaınýldın quttyqtap, Ulystyń ulyq merekesine qaraı tilegin jetkizdi. «Barsha úrjarlyqtar úshin bıylǵy Naýryzdyń arman men asyl úmitterdiń iske asýy, molshylyq pen tyń tabystardyń bastaýy, qýanysh pen shattyqqa toly jyl bolatynyna senimimiz mol. Jer ana uıqysynan oıanyp, kún men tún teńeletin Ulystyń Uly kúni - tyń bastamalar, izgi maqsattar men ıgilikti isterge jetelesin. Naýryz ár otbasyna molshylyq, bereke-birlik jáne baq ákelsin. Shańyraqtaryńyzdan yrys pen beıbitshiliktiń, tatýlyq pen taza aq peıildiń rýhy sarqylmasyn», - dedi aýdan ákimi.

 

Merekelik sharada qazaq halqynyń salt-dástúri men bereke-baılaǵyn beıneleıtin teatrlandyrylǵan qoıylym kórsetildi. Bul qoıylymda qazaq aýylynyń tabıǵattyń túlep, Jer-ananyń jańarǵan ýaqytyndaǵy jyl basy, ǵasyrlar qoınaýynan kele jatqan dostyq pen yntymaqtastyqtyń merekesi sanalatyn Naýryz meıramyn toılaý daıyndyǵy kórsetildi. Onda qoıylymnyń negizgi jelisi Qydyr atanyń kelýi, aqsaqaldar qushaqtasyp, ájeler shashý shashyp, Taıqazanda kelinshekter Ulttyq naýryz kójemizdi pisirip, odan ári «Naýryz - Rýhanı jańǵyrýdyń bastaýy» bólimi usynyldy.

 

Aıta keteıik, Ortalyq alańda jıyrmaǵa jýyq aqshańqan kıiz úıler tigildi. Onda merekelik dastarhan jaıylǵan. Mol dastarhan basynda bas qosqan ata-ájelerdiń kóńil-kúıi Naýryz kúngi kóktemniń jaıdary kúnindeı kóterińki. Bir-birimen saǵynysyp kórisken qarttar amandyq-saýlyq surasyp, qaýqyldasyp júr.

   Osy kúni alańǵa jınalǵan jurt Naýryzdyń dástúrli kójesinen dám tatty. Aıtpaqshy, alańnyń bir bóliginde «Eń dámdi kóje» saıysy ótkizilse, kishkene búldirshinder úshin «Naýryz erkesi» atty oıyndar oınatyldy.
 

Aýdan ortalyǵynda ótken merekeniń taǵy bir ereksheligi qazaqsha kúresten - «Úrjar barysy» jarys ótkizildi. Bilek sybanǵan er jigitter kópshilikke naǵyz qazaq halqyna tán qasıetterdi pash etti. «Úrjar barysy» ataǵyn Qabanbaı aýylynan Ersin Seıitqazınov jeńip alyp, ol «túıe balýan» atanyp, arnaıy júldege ıe boldy.

 Osylaısha, Ulystyń uly kúninde erekshe shattyqqa bólengen úrjarlyqtar keler jylǵy Naýryz meıramyn aman-saýlyqta kórýge tilek tilesti.