ShQO: Úrjarda sút óndirisi kooperatıvine birigýshiler sany artyp keledi
ÚRJAR. QazAqparat - Shyǵys Qazaqstan oblysy Úrjar aýdanynda sút óndirisi órkendep keledi. Úlken kooperatıvke birikken sharýalar aldaǵy ýaqytta sút ónimderin basqa óńirlerge de satýdy kózdep otyr, dep habarlaıdy QazAqparat tilshisi.
Úsh jyl buryn memlekettiń qoldaýymen ashylǵan «Arystanbek-Úrjar» JShS jetekshisi Talǵat Aqpekov «Jumyspen qamtý jol kartasy - 2020» baǵdarlamasy boıynsha jeńildetilgen nesıege de qol jetkizgen bolatyn. «Ertis» áleýmettik kásipkerlik korporatsııasynan 12 mıllıon teńge, Aýyl sharýashylyǵyn damytý qorynan 5 mıllıon teńge alǵan kásipker «Qazaqstanda jasalǵan» jalpyulttyq aktsııasy aıasynda sút qabyldaý jáne óńdeý zaýytyn ashqan. Zaýytta táýligine 2 tonna sút óńdeledi. Qazirgi kezde shaǵyn kásiporyn taza sútten 14 túrli sút ónimin shyǵarýda. Onyń ishinde maılylyǵy túrli deń¬geı¬degi súttiń 5 túri, sary maı, kilegeı, súzbe, qurt, irimshik jáne aıran syndy ónimder bar. Suranys ta az emes. Búginniń ózinde sút qabyldaý jáne óńdeý zaýyty 2 aýrýhana, 5 balabaqsha men 45 mektepti taza ónimmen qamtamasyz etip otyr.
«Jazda Alakól jaǵalaýyna, «Barlyq-Arasan» shıpajaıyna kelgen demalýshylar da bizdiń ónimderimizdi tutynady. Іri qalalardan alys ornalasqandyqtan ónimniń sapasy men tabıǵı qunary erekshe. Keleshekte óndiris kólemin arttyryp, basqa qalalarǵa, aýdandarǵa da shyǵarýdy kózdep otyrmyz», - deıdi zaýyt dırektory Talǵat Aqpekov.
Aıta keteıik, aýdanda sút óndirisin óristetýge basa mán berilip, osy arqyly syrttan keletin sút taýarlary kólemin azaıtý, óz ónimderin ózgege satý josparlanǵan. Bul maqsatta aýyldarda kooperatıvti óndiristi damytý qajettigi týyndap otyr. Osyǵan oraı ótken jyly osy seriktestik «Úrjar sút» kooperatıvin qurǵan.
Talǵat Moldashulynyń aıtýynsha, kooperatıvke ázirge 219 bas iri qarasy bar 35 adam kirgen. Endi buǵan basqa úrjarlyqtar da qyzyǵýshylyq tanytyp, usynystaryn bildirýde.
Sondaı-aq dál osy ispetti sút qabyldaý jáne óńdeý orny Maqanshy aýylynda da ashylǵan. Qaı¬rolla Nyǵmet esimdi Qytaıdan oralǵan qandasymyz 5 mıllıon teńge jeńildetilgen nesıe qarjysyna shaǵyn sút zaýytyn ashty. Kásiporyn ónimderi de óńirdegi bilim berý, densaýlyq saqtaý jáne qorǵanys salasyndaǵy mekemelerdi arzan ári sapaly sútpen qamtamasyz etýde.
