ShQO: Úrjarda 2,5 myń túp kóshet otyrǵyzyldy
ÚRJAR. QazAqparat - Shyǵys Qazaqstan oblysy Úrjar aýdanynda ótken jalpyaýdandyq senbilikte 2500 túp túrli aǵash kóshetteri otyrǵyzyldy. Osylaısha aýdan aýmaǵynda úıeńki, emen, qaıyń, shaǵan jáne taǵy da basqa aǵashtar tamyr jaıatyn bolady, dep habarlaıdy QazAqparat tilshisi.
Eske sala keteıik, aýdan basshysy Serik Zaınýldın «Aýdandaǵy eldi mekenderdi abattandyrý, kógaldandyrý, sanıtarlyq tazalyq jónindegi eki aılyq ótkizý» týraly ókimge qol qoıǵan. Oǵan sáıkes jalpyaýdandyq ekologııalyq aılyq aıasyndaǵy senbilik 9 sáýirde bastaldy.
«Búgingi kúni aýdan ortalyǵy Úrjar aýylynda jańadan ashylǵan «Balalar saıabaǵyna», ortalyqtaǵy «Batyrlar alleıasyna», sport mektebiniń mańaıyna jáne ortalyq stadıon men Abylaıhan dańǵyly boıyna barlyǵy 2500 túp kóshet (ishinde jemis aǵashtary da bar ártúrli aǵash tuqymdary) jáne 50 túp shyrsha aǵashy otyrǵyzyldy. Kóshetter Almaty oblysynyń Sarqan qalasynan ákelingen. Aýdan aýmaǵyn kógaldandyrý eldi mekenniń ekologııalyq jaǵdaıyn jaqsartýǵa baǵyttalǵan mańyzdy qadam bolyp tabylady. Jasyl jelek aýdan ortalyǵynyń kelbetin kóriktendirip qana qoımaıdy, onyń mıkroklımatyn da ońaltady. Aýany tazartyp, ylǵaldylyqty arttyrady, dańǵazany tómendetedi», - deıdi Úrjar aýyldyq okrýginiń ákimi Saılaýǵazy Sharyqpaev.
Aıta keteıik, ekologııalyq aılyq kezinde kógal aýmaǵyn jasyldandyryp, aýdandyq saıabaqtar men gúlzarlardy, sondaı-aq barlyq kóshelerdi retke keltirip, aǵashtardy ákteý josparlanǵan.
