ShQO: Úrjar aýdanynyń jármeńkesi ótti
ÚRJAR. QazAqparat - Búgin Shyǵys Qazaqstan oblysynyń ortalyǵy Óskemen qalasynda Úrjar aýdanynyń aýylsharýashylyq ónimderiniń jármeńkesi ótti, dep habarlaıdy QazAqparat tilshisi.
Úrjardan barǵan kásipkerlerdiń aýylsharýashylyq ónimder jármeńkesi oblys ortalyǵynyń «Fresh market» gastronomynyń aldyn qyzý bazarǵa aınaldyrdy.
Aýdannyń aýylsharýashylyq bóliminiń basshysy Táýirjan Shomanovtyń aıtýynsha, jármeńkede ónimder qala bazarynyń naryǵyndaǵy 10-15 paıyzǵa tómen baǵada satylǵan.
Onda 6 tonna et ákelip, sıyr eti - 1 300-1 500 teńge, qoı eti - 1 200, jylqy eti - 1 300-1 600 teńgeden saýdalandy. Sary maıdyń kelisi - 2 myń teńge, qymyzdyń lıtri - 500 teńge, baldyń kelisi 1 myń teńgeden baǵalandy. Sonymen qatar jármeńkede kókónis, oramjapyraq, kartop, pııaz sórege qoıyldy. Kilegeı, irimshik, qurt, aıran sııaqty sút taǵamdaryn «Arystanbek-Úrjar» JShS molynan aparyp, qoljetimdi baǵamen qala turǵyndaryna usyndy. 
Jármeńkeni ótkizýge aýdannyń 17 aýyldyq okrýginen 20-dan asa sharýa qojalyǵy men kásipkerler belsene qatysty.
Aıta keteıik, jármeńke barysynda úrjarlyq kórkemónerpazdar óskemendikterdi án-jyrǵa bóledi.
