ShQO ýnıversıteti drondar qurastyrmaqshy
ÓSKEMEN. QazAqparat - Shyǵys Qazaqstan oblysynyń D.Serikbaev atyndaǵy memlekettik tehnıkalyq ýnıversıteti «Robottalǵan pılotsyz júıeler» oqý baǵdarlamasyn júzege asyrmaq, dep habarlaıdy QazAqparat tilshisi.
Atalmysh ýnıversıtet zamanaýı ındýstrııa talaptaryna saı jeti oqytý baǵdarlamasyn qolǵa alyp otyr.
«Robottalǵan pılotsyz júıeler» baǵdarlamasy - sonyń bireýi ǵana. Baǵdarlamany úılestirýshi Tamara Segeda osy joba aıasynda Vengrııanyń Obýda ýnıversıtetimen, Reseıdiń Novosibir memlekettik tehnıkalyq ýnıversıtetimen baılanys ornatqandaryn aıtady.
«Baǵdarlama pılotsyz tehnıkany óndirý jáne paıdalaný, ázirleý boıynsha quzyretterdi alýǵa baǵdarlanǵan. Oqytý protsesi júıelik ınjınırıngten bastap avtomatty basqarýdyń algorıtmderin jazýǵa deıingi kezeńderin qamtıdy» - deıdi ol.
Altalmysh baǵdarlama boıynsha bilim alǵan túlekter óńirdegi geologııalyq kompanııalarǵa jumysqa ornalasady dep kútilýde.
Búginde geologııalyq barlaý, topografııalaý, aýmaqtyń sandyq modelin alý, munaı-gaz kenishteri men qurylys alańdaryna monıtorıng júrgizý, tehnogendi jáne tabıǵı apat qaterlerin baqylaý jumystaryna drondar keńinen qoldanylýda. Baǵdarlama shákirtteri osy drondardy ár salaǵa qaraı baǵdarlamalaý isimen shuǵyldanatyn bolady.
Bul salaǵa mamandanatyn magıstrler «Qaztsınk» JShS men Tótenshe jaǵdaılar komıtetiniń tapsyrysy boıynsha oqytylatyn bolady.
Dál osyndaı ekijaqty kelisimshart aıasynda «Naqty jer óńdeý», «Medıtsınalyq tehnıka», «Addıtıvti tehnologııalar», «Jerdi zertteýdiń sandyq ádisteri», «Tolyqtyrylǵan vırtýaldy shyndyq», «Ómirdi qamtamasyz etýdiń zııatkerlik júıesin basqarý» sııaqty jańa tehnolgııalarǵa negizdelgen mamandyqtar boıynsha bilim berý qolǵa alynbaq. Bul jeti baǵdarlama da Bilim jáne ǵylym mınıstrliginiń maquldaýynda jatyr. Sonymen birge ýnıversıtet qabyrǵasynda oqytýǵa qajet materıaldyq-tehnıkalyq baza daıyndalýda.
Aıta keteıik, atalmysh ýnıversıtet ǵalymdary jergilikti zaýyttarmen birlesip tantal men tıtannan ımplanttar ázirleý jobasyn iske asyrýda.
Foto: wsgz.ru
