ShQO týroperatorlary tabıǵı nysandarǵa aparatyn kólik joldaryn jaýyp tastaýdy talap etti
ÓSKEMEN. KAZINFORM – Shyǵys Qazaqstan oblysyndaǵy týroperatorlar Qıyn Kerish shatqaly, Shekelmes múıisi men Radon kóli syndy tabıǵaty tamasha jerlerge aparatyn kólik joldaryn jaýyp tastaýdy talap etti. Olardyń aıtýynsha, kólikterdiń arly-berli júrýinen tabıǵatqa zalal kelip jatyr.
ShQO kásipkerler palatasynda ótken týrızm keńesiniń otyrysynda týroperatorlar tabıǵı nysandarǵa aparatyn joldardy jabý týraly bastama kóterdi. Olardyń aıtýynsha, bul tarıhı ári kórikti jerlerdi bolashaq urpaqqa saqtap qalýdyń birden-bir joly.
- Qıyn-Kerish pen Shekelmes «jabaıy» týrısterdiń kóptep kelýinen orasan zııan shegip jatyr. Áleýmettik jeli úshin erekshe fotosýretke túsemin degen adamdar sazdy betkeıler men shatqaldarǵa kólikpen shyǵyp ketedi. Bul biregeı landshaftty buzady. Úńgirler qoqysqa tolyp, joldar qırap barady. Oblystyń vızıttik kartochkasyna aınalǵan jerlerdi ózimiz qurtyp jatyrmyz, - deıdi «Voıaj – Altaı Kazahstan» JShS dırektory Irına Klınovıtskaıa.
Rıdder irgesindegi 2000 metrge jýyq bıiktikte ornalasqan Radon kóline baratyn jolda da kúrdeli jaǵdaı qalyptasqan. Buryn bul baǵytta kásibı júrgizýshiler ǵana qatynaıtyn. Alaıda qazir osy jerdiń tanymaldyǵy artqan saıyn halyq japa-tarmaǵaı kele beretin boldy.
- Sonyń saldarynan jol buzylyp, topyraq erozııasy kúsheıip, ózen arnasy buryldy. Buǵan tosqaýyl qoıylmasa, kóp uzamaı jaıaý da jete almaı qalamyz, - deıdi ShQO kásipkerler palatasy janyndaǵy týrızm jónindegi keńes tóraǵasy Symbat Ramazanov.
Jıynǵa qatysýshylar tabıǵı nysandarǵa kireberis joldy beton bloktarmen jaýyp tastap, tek jaıaý júrginshiler óte alatyndaı qylýdy usyndy. Endi týroperatorlar bıliktiń sheshimin kútip otyr.
- Biz bul usynysty qarastyrýǵa daıynbyz. Tabıǵatty saqtap qalý mańyzdy dep sanaımyz. Biraq ol jaqqa barýǵa tolyqtaı tyıym salý múmkin emes. Dese de jaıaý júretin marshrýttardy ázirleýge bolady. Kólikterdi ne isteý kerektigin oılastyramyz», - deıdi ShQO kásipkerlik jáne ındýstrıaldy-ınnovatsııalyq damý basqarmasy basshysynyń orynbasary Marat Qabaqov.
Eske salsaq, osyǵan deıin Qazaqstan men Ózbekstan týrızm salasyndaǵy yntymaqtastyqty nyǵaıta túsetindigi habarlanǵan.