ShQO túrmelerine qajetti jylý qazandyqtarynyń qurylysy 5 jyldan beri qańtarylyp tur
ÓSKEMEN. QazAqparat - Shyǵys Qazaqstannyń Jarma aýdanynda 2013 jyldan beri turalap turǵan jańa jylý qazandyǵynyń qurylysy qaıta jandanýy múmkin, dep habarlaıdy QazAqparat tilshisi.
Jarma aýdanyndaǵy birneshe túzeý mekemesi ornalasqan Shýaq aýylyna jańa jylý qazandyǵy qajet ekeni 2010 jyly belgili bolǵan edi. Tozyǵy jetken, eski qazandyqta apat bolyp, aýyl bir aı boıy jylýsyz qalǵan bolatyn. 2011 jyly eski qazandyqty jańalaý týraly sheshim qabyldanyp, jańa nysannyń qurylysy bastaldy. Joba quny sol tusta 2,7 mlrd teńgege baǵalanǵan. Merdiger kompanııa bul aqshany 2013 jyldyń ortasyna deıin ıgerip, árqaısysy saǵatyna 6,5 Gkal jylý óndiretin úsh qazandyq ornatýǵa mindetteldi. Alaıda, mejeli ýaqytta qurylys bitpeı, is sotqa berildi. Saldarynan Shýaq aýyly áli de eski qazandyqqa kiriptar kúıde otyr.
Búgin oblys ákimi Danıal Ahmetov atalmysh nysanǵa bas suǵyp, ishindegi qondyrǵylardyń jaǵdaıymen tanysty. Qurylysty aıaqtap, qazandyqty qoldanysqa berý úshin qosymsha qarajat kerek. Onyń kólemin táýelsiz sarapshylar 500-800 mln teńgeniń arasynda baǵalap otyr. Aýyl shetinde qańyrap qalǵan qurylysty kóldeneń kók attylar tonap ketpes úshin aýdandyq ákimdik ony kúzetke alǵan.
«Qondyrǵylardyń bári jaqsy saqtalǵanǵa uqsaıdy. Jobany aıaqtaý úshin smetasyn jańalaý qajet» - dedi Danıal Ahmetov.
Bul qazandyq Shýaq aýylyndaǵy túzeý mekemelerimen qatar, ondaǵy qyzmetkerlerdiń baspanasyn jylytatyn bolady. Nysannyń naqty jaǵdaıyn anyqtaý úshin tehnıkalyq zertteý júrgizilmek.
«Aýdandyq bıýdjetke nysandy tehnıkalyq turǵyda zerttep, jobalyq-smetalyq qujattaryna túzetý engizý úshin 20 mln teńgeniń tapsyrysyn túsirdik. Qurylysty aıaqtaýǵa naqty qansha qarajat kerektigi sol kezde belgili bolady» - deıdi aýdandyq Sáýlet, qala qurylysy jáne qurylys bóliminiń basshysy Raýan Baılov.
