ShQO túrmelerinde 13 myń sharshy metr óndiristik alań bos tur
Bul týraly oblystyq prokýratýrada ótken vedomstvoaralyq keńeste aıtyldy. Jergilikti ákimdikter men qylmystyq-atqarý departamentiniń qyzmetkerleri, «Atameken» ulttyq kásipkerler palatasy men bıznes ókilderi sottalǵandardy kolonııalarda jumyspen qamtý máselelerin talqylady.
«Qazirgi kezde oblystyń túzeý mekemelerinde «Eńbek-Óskemen» RMK fılıaldary men 64 jeke kásipker qyzmet etedi. Olar 1,5 myń sottalǵan azamatty jumyspen qamtyǵan. Taǵy 400-den astam azamat óndiristik-sharýashylyq jasaqtarda eńbek etedi», - deıdi oblystyq prokýratýranyń baspasóz hatshysy Ásel Momynjanova.
Onyń aıtýynsha, atalmysh nysandarda jumys istegeni úshin olarǵa eńbek kelisimsharttary negizinde jalaqy tólenedi. Ol aqshaǵa sottalǵan azamattar qajetti azyq-túlik pen turmystyq zattar alady. Keıbiri ony týystaryna jiberse, keıbiri jasaǵan qylmysynyń materıaldyq shyǵynyn óteıdi.
«Túzeý mekemelerinde kóbinese qum jáne gaz bloktary, trotýar taqtalary sııaqty qurylys materıaldary óndiriledi. Plastık terezeler men esikter qurastyryp, korpýstyq jáne jumsaq jıhaz, metal buıymdary men tigin ónimderin shyǵaraýshylar da bar. Bir aıta keterligi, munda shyǵarylǵan ónimderge suranys joǵary», - deıdi prokýratýra ókili.
Degenmen, bul turǵyda múmkindik áli de tolyq paıdalanylmaı otyr.
«Óskemen, Semeı qalalary men Shemonaıha, Jarma aýdandarynyń túzeý mekemelerinde barlyq ınjenerlik ınfraqurylymy bar 13 myń sharshy metr óndiristik oryn bos tur. Vedomstvo ókilderi túzeý mekemeleriniń basshylary men «Eńbek-Óskemen» RMK fılıalyna kásipkerlik nysandarmen ózara is-qımyldardy jetildirýdi tapsyrdy», - deıdi Ásel Momynjanova.