ShQO turǵynynyń mopedin aıdap ketken 15 jastaǵy bozbala ustaldy
ÓSKEMEN. QazAqparat – Shyǵys Qazaqstan oblysy Altaı qalasynda «Racer» markaly mopedti aıdap ketken bozbalaǵa qatysty qylmystyq is qozǵaldy, dep habarlaıdy QazAqparat tilshisi.
ShQO polıtsııa departamenti baspasóz qyzmetiniń málimetine súıensek, «102» jedel arnasyna 45 jastaǵy qala turǵyny habarlasqan.
Óz sózinde ol garaj qulpyn syndyryp ishke kirgen belgisiz bireýdiń «Racer» mopedin urlap ketkenin aıtty.
Osynyń saldarynan kelgen materıaldyq shyǵyn 50 myń teńgege baǵalanǵan.
«Jedel-izdestirý sharalaryn júrgizgen krımınaldyq polıtsııa qyzmetkerleri kóp uzamaı qylmysty isti ashty. Urlyqqa qatysy bar degen kúdikpen 15 jastaǵy bozbala jetkizildi. Jaýap alý barysynda ol óz kinásin moıyndap, mopedti ıesine qaıtardy. Qazirgi ýaqytta kámeletke tolmaǵan bala ata-anasyna tapsyrylǵan» dep habarlady vedomstvo ókilderi.
Qazirgi ýaqytta atalǵan fakti boıynsha QR QK 188-baby 3-bóligi 3-tarmaǵyna sáıkes sotqa deıingi tergeý amaldary júrgizilýde.
Osy rette polıtsııa departamenti balalardyń qylmys jasaýyna jol bermeý maqsatynda ata-analarǵa turaqty túrde túsindirý jumysyn júrgizý qajettigin eskertedi.
