ShQO turǵynynyń kóliginen elik eti tabyldy

ÓSKEMEN. QazAqparat – Shyǵys Qazaqstan oblysynda kóliginen elik eti tabylǵan er adamǵa qatysty qylmystyq is qozǵaldy, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, aqpan aıynyń ortasynda tártip saqshylary «Óskemen-Rahman qaınarlary» tasjolynda «ÝAZ» avtokóligin toqtatqan. Serebrıansk qalasynyń 35 jastaǵy turǵyny tizgindegen kóliktiń júksalǵyshynan bir qap et pen 2 shańǵy tabylǵan.

«Úıge bara jatqanyn aıtqan júrgizýshi ettiń eliktiki ekenin, ony ózi kesip alǵandyǵyn jetkizdi. Onyń qaltasynan pyshaqqa uqsas zat shyqty. Kólik salonynda taǵy 1976 jáne 2000 jyly týǵan eki er adam bolǵan. Jolaýshylar Serebrıansk jáne Altaı qalalarynda turady», - dedi ShQO PD bastyǵy Saǵat Mádıev.

Tergeý júrgizý maqsatynda júrgizýshi men jolaýshylar Buqtyrma polıtsııa bólimine jetkizildi. Atalǵan fakti boıynsha QR Qylmystyq Kodeksiniń 337-baby 3-bóligimen (zańsyz ań aýlaý) sotqa deıingi tergeý bastaldy.