ShQO turǵynynan 1 tonnadan astam balyq tárkilendi
ÓSKEMEN. QazAqparat – Óskemen qalasynyń polıtseıleri jergilikti turǵynnyń kóliginen zańsyz aýlanǵan myń keliden astam balyq tárkiledi, dep habarlaıdy QazAqparat.
Qalalyq Polıtsııa basqarmasy baspasóz qyzmetiniń málimetine súıensek, «Quqyqtyq tártip» jedel aldyn alý sharasy barysynda qalaǵa kireberistegi Sheshek asýy tusynda «Gaz-3302» markaly avtokólik toqtatylǵan. Tekserý barysynda júrgizýshiniń balyqty tıisti qujatsyz tasymaldaǵany anyqtaldy.
«Er adamnyń aıtýynsha, ol bul balyqty Kúrshim aýylynda belgisiz bireýlerden satyp alǵan. Balyqtyń jalpy salmaǵy 1 182 keli», - dep habarlady vedomstvo ókilderi.
Qazirgi ýaqytta júrgizýshige qatysty QR ÁQBtK-niń 389-baby boıynsha tergeý amaldary júrgizilip jatyr.
