ShQO turǵyny: Zyrıanda 40 jyldan beri munsha jol jóndelmegen
ÓSKEMEN. QazAqparat - ShQO ákimi Zyrıan aýdanyna jasaǵan issapary kezinde jol jóndeý jumystarynyń barysymen tanysty. Nátıjesinde merdiger atanǵan kompanııalar barlyq joldardy 20 tamyzda qoldanysqa berýge mindet aldy, dep habarlaıdy QazAqparat tilshisi.
Aýdan ortalyǵynyń ózinde birneshe kóshe úlken jóndeýden ótýde. Olardyń ishinde Rýdnaıa, Jaqsybaev, Gorkıı sııaqty negizgi dańǵyldar da bar. Ásirese 1964 jyly asfalt tóselgen Gorkıı kóshesi sońǵy 25 jylda jóndeý kórmepti.
Jóndelýi tıis 15 kósheniń 9-ynda jóndeý jumystary bastalǵan. Al 6 kóshede konkýrstyq protsedýralardyń sozbaqqa salynýy saldarynan áli bastalmaǵan.
Osy maqsatqa bólingen 311 mln teńgeniń ázirge tek 80 mln teńgesi ǵana ıgerilgen. Aımaq basshysy merdigerlerdi jumysqa qarqyn qosýǵa shaqyrdy.
«Barlyq joldar 20 tamyzǵa deıin daıyn bolýy kerek. Bólingen aqshany nege ıgermeı otyrsyzdar? Jaz bolsa bitip keledi. Al jumysta ne sapa, ne ónim joq. Mejelengen merzimde jumys aıaqtalatyn bolsyn, sapany da esten shyǵarmańyzdar» - dedi oblys ákimi.
Danıal Ahmetov shahardyń syrtqy kelbetin de synǵa aldy. Ásirese jek menshik saýda oryndarynyń kelbeti qalanyń jalpy kórkin buzyp turǵanyna nazar aýdardy.
«Zyrıanda sońǵy 40 jylda munsha jol jóndelmegen. Ol úshin rızamyz. Biz de Óskemenge uqsap úılerdiń aýlasyn zaman talabyna saı abattandyrmaqpyz. Soǵan kómektesseńizder» - dedi Vladımır Derıgzalov esimdi turǵyn.
Aımaq basshysy jýyqta ǵana Zyrıan qalasynda ashylǵan ınsýlt ortalǵyna bas suqty. Munda barlyq qajetti qondyrǵylar jetkizilgenimen jóndeý jumystary aıaqtalmapty.
«Sapaly qondyrǵylar men jaıly tósekter alynypty. Osyndaı jaǵdaı jasalyp otyrǵanda qurylysshylardyń jumysty saǵyzsha sozǵany durys emes. Jumysty jandandyra túsińizder» - dedi ol.
