ShQO turǵyny úıinde 50 keliden astam esirtki saqtaǵan

ÓSKEMEN. QazAqparat – 7 qyrkúıek kúni Óskemen-1 stantsııasyndaǵy jelilik polıtsııa bólimi basshysynyń jetekshilik etýimen «Tranzıt» jedel aldyn alý sharasy aıasynda Shyǵys Qazaqstan oblysy, Serebrıansk temirjolyna jaqyn ornalasqan jer úılerdiń birine tintý júrgizildi, dep habarlaıdy QazAqparat tilshisi.

Tintý barysynda 45 jastaǵy azamattyń baqshasynda, aýlasynda, shatyrdyń astynda jáne úıiniń ishinde polıetılen paketterge salynǵan, ótkir ıisi bar jasyl tústi ósimdik tektes zattar tabyldy. Sot-hımııalyq saraptamanyń qorytyndysyna sáıkes, bul zattar qarasora men keptirilgen marıhýana bolyp shyqty.

Tárkilengen esirtkiniń jalpy salmaǵy 50 keliden asady. Atalǵan fakti boıynsha esirtki zattaryn asa iri kólemde zańsyz saqtaǵany úshin sotqa deıingi tergeý bastaldy.

Aıta keteıik, Óskemen-1 stantsııasyndaǵy jelilik polıtsııa bólimi jyl basynan beri esirtkige qatysty 13 qylmys faktisin anyqtady. Onyń ekeýi aýyr sanatqa jatqyzylǵan.