ShQO turǵyny túınemege uqsas belgilermen aýrýhanaǵa tústi
ÓSKEMEN. QazAqparat - Shyǵys Qazaqstannyń Katonqaraǵaı aýdanyna qarasty Kishi Naryn aýylynyń turǵyny sibir jarasy (túıneme) dertine uqsas belgilermen aýrýhanaǵa tústi. Bul aýylda byltyr da bir adam atalmysh indetten qaıtys bolǵan, dep habarlaıdy QazAqparat tilshisi.
Ótken jyly aýrý maldan indet juqtyrǵan Kishi Naryn aýylynyń turǵyny oblys ortalyǵynda kóz jumǵan bolatyn. Keshendi tekserý barysynda indet oshaǵy 1972 jyly kómilgen qorymnan shyqqany anyqtalǵan. Aýdan halqyn túınemege uqsas derttiń taǵy da sol aýyldan shyǵýy alańdatyp otyr. Resmı oryndar ázirge indet oshaǵy týraly naqty aqparat bergen joq. Al indet juqtyrdy delingen naýqastyń jaǵdaıy dárigerlerdiń baqylaýynda.
«60 jastaǵy turǵyn qazir Katonqaraǵaı aýdandyq aýrýhanasynyń juqpaly aýrýlar bóliminde jatyr. Qazirgi dıagnozy - bileziktegi juqpaly jara. Naýqas malmen qatynasta bolǵandyqtan, sibir jarasyn anyqtaý úshin synamalar alynyp, asa qaýipti aýrýlar zerthanasyna jiberildi. Naýqasty emdeý joldaryn pysyqtaý úshin oblys ortalyǵynan ınfektsııa jáne epıdemıologııa mamandary jiberildi. Dárigerlerdiń konsılıýmy boıynsha «Sibir jarasynyń teridegi formasy» degen aldyn ala dıagnoz qoıylyp otyr. Degenmen, tereńdetilgen zertteýler júrip jatyr. Sonyń nátıjesi boıynsha tolyq aqparat beriledi» - delingen oblystyq densaýlyq saqtaý departamentiniń resmı aqparatynda.
Naýqastyń úıindegi ózge 3 adam ázirge densaýlyqtaryna shaǵym aıtpaǵan. Olar da dárigerler baqylaýyna alynǵan. Jaýapty organdar aýyl ishinde eshbir maldyń aýrýdan ólmegenin, májbúrli soıý tirkelmegenin aıtyp otyr.
Qazir oqıǵa ornyna tıisti mamandar jetip, sibir jarasynyń aldyn alý boıynsha halyqqa túsindirý jumystaryn júrgizip jatyr.
