ShQO turǵyny shuńqyrǵa qulaǵan balany qutqarǵany úshin marapattaldy
ÓSKEMEN. QazAqparat – Shyǵys Qazaqstan oblysy Katonqaraǵaı aýdanynda ájethana shuńqyryna qulap ketken balany qutqarǵan azamat marapattaldy, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, Katonqaraǵaı aýdandyq ákimdiginde azamattyq qorǵaý organdarynyń 25 jyldyq mereıtoıyna oraı kishkentaı balaǵa kómektesken Radjan Aıdarbaevqa «Tótenshe jaǵdaıdaǵy erligi úshin» tósbelgisi berildi.
Ótken jyldyń qyrkúıek aıynda áıel adam oıyn alańyna eki balasymen kelgen. Birneshe mınýt nazaryn basqaǵa burǵan ol kishi ulyn joǵaltyp alady. Anasy aıqaılap balany shaqyrǵanymen eshkim jaýap bermegen. Osy kezde sol mańaıda bolǵan Radjan Aıdarbaev qoǵamdyq ájethananyń shuńqyryna túsip ketken búldirshindi baıqap qaldy.
«Radjan birden kómekke umtylyp, balany shuńqyrdan alyp shyqty. Osyndaı beıbit kúnniń batyrlary maqtaýǵa turarlyq», - dep habarlady vedomstvo ókilderi.
