ShQO turǵyny polıtsııa oǵynan jaraqattandy: oqıǵa tekserilip jatyr
Aıta keteıik, oqıǵa 26 shildede «Qaraǵandy-Boǵas» tas jolynda tirkelgen. Polıtsııa qyzmetkerleriniń «toqta» degen pármenin oryndamaǵan 64 jastaǵy quqyqbuzýshy kóligimen qashyp, iz sýytyp ketpek bolǵan. Dál osy kóliktiń artqy salonynda 63 jastaǵy jolaýshy otyrǵan. Polıtsııa qyzmetkerleriniń biri júrgizýshini toqtatý úshin tabeldik qarýdy qoldanyp, alda kele jatqan kóliktiń dóńgelegine eki oq atqan. Atylǵan eki oqtyń biri salonǵa ótip ketip, jolaýshyǵa tıgen. Bul oqıǵa týraly birqatar BAQ jazǵan bolatyn. Bolǵan oqıǵany ShQO ІІD baspasóz qyzmeti rastap otyr.
Osy iske qatysty búgin ShQO prokýratýrasy resmı aqparat taratty. Quzyrly organnyń habarlaýynsha, polıtsııa qyzmetkerleri kólikti qýyp jetpekshi bolǵan kezde tabeldik qarýdy qoldanǵan: ıaǵnı, bir oqty aspanǵa, eki oqty «Mazda» kóliginiń dóńgelekterine atqan. Ustalǵan kezinde mas kúıindegi kólik júrgizýshisi Z. polıtsııa qyzmetkerlerine qarsylyq kórsetken.
«Sonymen birge, 27 shildede 63 jastaǵy B. degen azamat aýyr dene jaraqattarymen Aıagóz aýdandyq aýrýhanasyna jetkizilgen. Aldyn ala málimetter boıynsha, mas kúıdegi B. toqtatylǵan «Mazdanyń» artqy oryndyǵynda otyrǵan. Kólik júrgizýshisimen tartys kezinde polıtsııa qyzmetkerleri B. degen azamatty baıqamaǵan bolýy kerek. B. ózdiginen kólikten shyǵyp ketken, al keıin aýrýhanaǵa barǵan. Sol kúni Aıagóz aýdandyq aýrýhana dárigerleri Aıagóz AІІB-ne B. degen azamattyń dene jaraqattarynan basqa oqpen jaralanǵanyn habarlaǵan. Ol jaraqatty B. qandaı jaǵdaıda alǵanyn tergeý anyqtaıtyn bolady», - delingen prokýrordyń baspasóz baıanynda.
Sondaı-aq ShQO prokýrorynyń baspasóz qyzmeti atalǵan jaǵdaı boıynsha QR QK-niń 362-baby, 4-bóligi (bılikti nemese laýazymdyq ókilettikterdi asyra paıdalaný kezinde aýyr zardaptarǵa ákelip soǵý) boıynsha sotqa deıingi tergeý bastalǵanyn habarlady.