ShQO turǵyny polıtseıge para bergeni úshin ustaldy

ÓSKEMEN. QazAqparat – Shyǵys Qazaqstan oblysy Besqaraǵaı aýdanynyń turǵyny polıtsııa qyzmetkerine para bergeni úshin ustaldy, dep habarlaıdy QazAqparat tilshisi.

ShQO Polıtsııa departamenti ishki qaýipsizdik basqarmasynyń qyzmetkerleri 26 mamyr kúni Besqaraǵaı aýdandyq polıtsııa bóliminiń tergeýshisine para bergen 43 jastaǵy er adamdy ustady. Anyqtalǵandaı, ol óziniń «Aýdı» markaly kóligin qaıtaryp alý úshin tártip saqshysyna aqsha usynǵan. Bunyń zańsyz áreket ekenin túsindirse de qulaq aspaǵan azamat polıtsııa qyzmetkeriniń jumys ústeline 20 myń teńge qoıǵan.

«Tergeý barysynda belgili bolǵandaı, ustalǵan aýdan turǵyny urlyqqa qatysty qylmystyq is boıynsha kúdiktiniń biri bolǵan. Onyń kóligi zattaı aıǵaq retinde tárkilengen. Er adam sóz baılasqan sybaılastarymen birge urlanǵan dúnıe-múlikti osy kólikpen tasymaldaǵan», - deıdi ShQO Polıtsııa departamentiniń bastyǵy Saǵat Madıev.

Qazirgi ýaqytta ustalǵan adamǵa qatysty QR Qylmystyq kodeksiniń 367-baby 1-bóligi (para berý) boıynsha sotqa deıingi tergeý amaldary júrgizilýde. Endi ol para mólsherinen jıyrma eselengen aıyppul tóleýge mindettelip nemese úsh jylǵa deıin bas bostandyǵynan aıyrylýy múmkin.