ShQO turǵyny otqa oranǵan páterden eki balany aman alyp shyqty
ÓSKEMEN. QazAqparat – Shyǵys Qazaqstan oblysynyń turǵyny otqa oranǵan páterden 8 jáne 2 jastaǵy eki balany alyp shyqty, dep habarlaıdy QazAqparat tilshisi.
ShQO tótenshe jaǵdaılar departamenti baspasóz qyzmetiniń málimetine súıensek, Shúlbi kentindegi 5 qabatty turǵyn úıden órt shyqqan.
Oqıǵa ornyna órt sóndirýshiler shuǵyl kelip jetti. Sol kezde tilsiz jaý birinshi qabatta ornalasqan páterdegi jıhaz ben jeke zattardy sharpyp jatty.
«Úsh ıindi baspaldaqtyń kómegimen ekinshi qabattaǵy 2 áıel qutqaryldy. Sondaı-aq podezden 15 turǵyn, onyń ishinde 5 bala evakýatsııalandy. Qutqarýshylar kelgenge deıin 1982 jylǵy azamat Fedor Gorıachkın janyp jatqan páterden 8 jáne 2 jasar eki balany qutqaryp úlgergen» dep habarlady vedomstvo ókilderi.
Kóp uzamaı jalpy aýdany 16 sharshy metrge jetken qyzyl jalyn aýyzdyqtaldy.
Órtti sóndirýge 13 adam men 3 tehnıka jumyldyrylǵan.
Aldyn ala málimet boıynsha, órttiń shyǵýyna balalardyń otpen oınaýy sebep bolǵan.
