ShQO turǵyny monsha jaǵamyn dep qorasyn órtep jibergen
ÓSKEMEN. QazAqparat – Shyǵys Qazaqstan oblysy Rıdder qalasynyń turǵyny monsha jaǵyp jatqanda, abaısyzda shyqqan órt qorasyn sharpydy, dep habarlaıdy QazAqparat tilshisi.
ShQO Tótenshe jaǵdaılar departamenti baspasóz qyzmetiniń málimetine súıensek, demalys kúnderi óńir boıynsha 11 órt oqıǵasy tirkelgen.
«Rıdderde peshti durys paıdalanbaý saldarynan monshada órt shyqqan. Tilsiz jaý sol mańaıdaǵy turǵyn úı men qoraǵa jaıylyp ketti. Órt sóndirýshiler kelip jetkenshe malyn qutqarýǵa umtylǵan úı ıesiniń aıaǵyn kúıik shalǵan. Ol tek 2 sıyrdy syrtqa alyp shyǵyp úlgerdi. Mamandandyrylǵan órt sóndirý bóliminiń qyzmetkerleri 106 sharshy metrge jaıylǵan qyzyl jalyndy bir jarym saǵatta aýyzdyqtady», - dep habarlady vedomstvo ókilderi.
Taǵy 2 órt Borodýlıha aýdanynda oryn alǵan. Onyń biri monshada pesh jaqqan kezde órt qaýipsizdigi erejelerin saqtamaýdan boldy. Tilsiz jaýdyń jalpy aýmaǵy – 12 sharshy metrdi quraǵan. Al Ivanovka aýylynda bolǵan ekinshi oqıǵada sharýashylyq qora-jaılar, qoqys pen shóp órtendi.
Osy rette, TJD ókilderi turǵyndarǵa barynsha abaı bolyp, órt qaýipsizdigi erejesin buzbaý qajettigin eskertedi.
