ShQO turǵyny kórshisiniń 200 orama shóbin órtep jibergen
ÓSKEMEN. QazAqparat – Shyǵys Qazaqstan oblysy Zaısan aýdanynda kórshisiniń shóbin órtep, 1 mln teńge shyǵyn keltirgen er adamqa qatysty is qozǵaldy, dep habarlaıdy QazAqparat.
Jýyqta Zaısan aýdandyq polıtsııa bólimine habarlasqan 36 jastaǵy azamat úı qorshaýynyń syrtyndaǵy 200 orama shóbin belgisiz bireýdiń órtep jibergenin aıtqan.
«Tártip saqshylary birden oqıǵa ornyna attandy. Anyqtalǵandaı, úı ıesi sol kúni tańerteń kórshisimen birge ishimdik ishken. Arada biraz ýaqyt ótkende masaıyp qalǵan aýyldastardyń arasynda kıkiljiń shyǵyp, ekeýi úıdi-úılerine tarasqan. Renishin basa almaǵan olardyń biri ekinshisiniń shóbin órtegen. Osynyń saldarynan jábirlenýshige 1 mln teńge mólsherinde materıaldyq zalal keltirildi», - dep habarlady ShQO Polıtsııa departamentiniń baspasóz qyzmetinen.
Qazirgi ýaqytta polıtseıler 31 jastaǵy er adamdy ustaǵan. Kúdikti óz kinásin moıyndady. QR Qylmystyq kodeksiniń 202-baby 2-bóligimen sotqa deıingi tergeý amaldary júrgizilýde.
