ShQO turǵyny kómektesemin dep ózgeniń atynan onlaın nesıe alyp kelgen

ÓSKEMEN. QazAqparat – Shyǵys Qazaqstan oblysynda polıtsııa qyzmetkerleri 20-dan astam adamdy aldap soqqan eki alaıaqty qolǵa túsirdi, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, tártip saqshylary «Anti-fraud» jedel aldyn alý sharasy barysynda ınternet alaıaqtyqpen aınalysqan eki adamdy ustady.

«30 jastaǵy er adam jarnama saıtyna sońǵy úlgidegi oıyn konsolin arzanǵa satatyn aıtyp jalǵan habarlandyrý jarııalaǵan. Ol qyzyǵýshylyq tanytqandarǵa óziniń shotyna aldyn ala tólem jasaǵanda ǵana konsoldi satatynyn aıtady. Aqsha túskennen keıin alaıaq telefondy óshirip, baılanysqa shyqpaı ketedi. Osylaısha, eldiń ár túrli óńirlerinde turatyn 9 jábirlenýshini aldaǵan», - delingen aqparatta.

Ekinshi alaıaq ınternette nesıe rásimdeýge kómek kórsetetindigi habarlandyrý jarııalaǵan. Oǵan senip qońyraý shalǵan azamattardan barlyq qajetti qujattardy, sonyń ishinde jeke kýálik, bank kartasy men basqa da jeke derekterin jınaǵan. Sodan keıin olardyń atynan onlaın nesıe rásimdep, aqshany ózine ıemdengen. Búgingi tańda quqyq qorǵaý organdary onyń zańsyz áreketinen zardap shekken 12 adamdy anyqtady. Biraq olardyń sany budan áldeqaıda kóp bolýy múmkin.

«Kúdiktilerge qatysty Qylmystyq kodekstiń 190-baby 2-bóligimen (alaıaqtyq) sotqa deıingi tergeý amaldary júrgizilýde. Olar 5 jylǵa deıin bas bostandyqtarynan aıyrylýy múmkin», - dedi departament bastyǵy Saǵat Mádıev.