ShQO turǵyny qomaqty qaryzyn qaıtarmas úshin ózin qaraqshylyq qurbany retinde kórsetken

ÓSKEMEN. QazAqparat – Shyǵys Qazaqstan oblysy Rıdder qalasynyń turǵyny tanysyna 4 mln teńgege jýyq qaryzyn qaıtarmas úshin polıtsııaǵa óziniń qaraqshylyqtyń qurbany bolǵany týraly jalǵan habar bergen, dep habarlaıdy QazAqparat tilshisi.

ShQO polıtsııa departamenti baspasóz qyzmetiniń málimetine súıensek, Rıdder qalasynyń 30 jastaǵy turǵyny ózine qaraqshylyq shabýyl jasalǵany týraly habarlaǵan.

Jábirlenýshiniń aıtýynsha, túnde betperde kıgen úsh belgisiz adam onyń úıine basa-kóktep kirip, kúsh kórsetip, 3 820 000 teńgesin alyp ketken. Aryz túsken soń tártip saqshylary atalǵan fakti boıynsha QK-niń 192-baby 3-bóligimen qylmystyq is qozǵady.

Alaıda keıinnen bunyń shyndyqqa múlde janaspaıtyny belgili boldy. Er adamǵa qatysty eshqandaı qylmys jasalmaǵan. Ol tanysyna qaryzyn qaıtarmas úshin oqıǵany oıdan shyǵarǵan. Qala turǵyny óz kinásin tolyq moıyndady.

Endi polıtsııaǵa jalǵan habar bergen er adam QR QK-niń 419-baby 3-bóligine sáıkes úsh jyldan segiz jylǵa deıingi merzimge bas bostandyǵynan aıyrylýy múmkin.