ShQO turǵyny karantın shekteýine qaramastan qyz uzatý toıyn ótkizgen
ÓSKEMEN. QazAqparat – Shyǵys Qazaqstan oblysy Borodýlıha aýdanynyń turǵynyna qyz uzatý toıyn ótkizgeni úshin aıyppul salyndy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, shekteý sharalaryna qaramastan qyz uzatý toıyn jasaǵan turǵyn úıine 50-ge jýyq qonaq shaqyrǵan. Jınalǵandar sanıtarııa normalaryn saqtamaǵan.
«Úı ıesine qatysty QR ákimshilik quqyq buzýshylyq týraly kodeksiniń 425-baby boıynsha ákimshilik hattama toltyryldy. Jınalǵan materıal oblystyq Taýarlar men qyzmetterdiń sapasy men qaýipsizdigin baqylaý departamentine jiberildi», - dep habarlady vedomstvo ókilderi.
Aıta keteıik, qazirgi ýaqytta óńirde 128 monıtorıng toby jumys istep júr. Olardyń quramyna polıtsııa qyzmetkeri, jergilikti atqarýshy organ ókili jáne Taýarlar men qyzmetterdiń sapasy men qaýipsizdigin baqylaý departamentiniń mamandary kiredi.
Esterińizge sala ketsek, Shyǵys Qazaqstanda shekteý sharalary 25 qarashaǵa deıin uzartyldy.
