ShQO turǵyny dánekerleýshi lampany paıdalanbaq bolyp, kúıip qaldy
ÓSKEMEN. QazAqparat - Shyǵys Qazaqstan oblysy Jarma aýdanynda dánekerleýshi lampanyń durys jumys istemeýi saldarynan 39 jastaǵy er adam denesiniń 90%-yn kúıik shaldy. Bul týraly QazAqparat ShQO TJD-ǵa silteme jasap habarlaıdy.
Zardap shegýshi aýyr halde jatyr. Aqaýy bar dánekerleýshi lampadan benzın atqylap, órt shyqqan. Er adam atalǵan quralmen qoıdyń basyn úıitpekshi bolǵan, alaıda syrtqy kıimi janyp ketken. Órt sóndirý qyzmeti shaqyrylmaǵan. Órt 0,5 sharshy metr aýmaqty qamtyǵan, biraq zardap shegýshini kúıik shalyp, aýrýhanaǵa aýyr halde jetkizilgen.
Besqaraǵaı aýdanynda 81 sharshy metrlik jeke úıde órt shyǵyp, 1955 jylǵy azamatshany 1,2 deńgeıli kúıik shalǵan. Onyń denesi, beti kúıip qalǵan. Áıel órtti ózi sóndirmekshi bolǵan, biraq esh nátıje shyqpaǵan. Dárigerler áıeldi tekserip, úıine jiberdi. Tilsiz jaýdy órt sóndirýshiler sóndirdi.
