ShQO turǵyny búkil aýyldy jaryqsyz qaldyrdy
GLÝBOKOE AÝDANY. QazAqparat - Shyǵys Qazaqstanda kabel urlaý qylmysy ashyldy, dep habarlaıdy QazAqparat ShQO polıtsııa departamentiniń baspasóz qyzmetine silteme jasap.
Polıtsııada Glýbokoe aýdandyq polıtsııa bóliminiń kezekshi bólimine aýyldardyń birinde elektrmen jaryqtandyrý baǵanalarynan 50 metr kabel urlanǵany týraly habarlama kelip túsken. Keltirilgen shyǵyn 121 myńnan astam teńgeni qurady.
«Jedel-izdeý sharalarynyń barysynda qylmysqa kúdikti tanylǵan 34 jastaǵy aýyl turǵyny anyqtaldy. Qaskúnem elektrmen jaryqtandyrý baǵanalarynan «SIP» markaly qýatty kabel men qalqandyq quraldy urlap áketken», - dep túsindirdi ShQO PD baspasóz qyzmetinen.
Kúdikti urlanǵan múlikti tústi metall qabyldaý ornyna tapsyrmaq bolǵan. Alaıda tártip saqshylarynyń shuǵyl is-qımyldarynyń arqasynda kúdikti azamat anyqtalyp, urlanǵan múlik tabyldy. QR QK 88-babynyń 1-bólimimen («Urlyq») sot aldyndaǵy tergeý amaldary bastaldy.
