ShQO turǵyny 9 jyl boıy ákesiniń zeınetaqy kartochkasyn bermeı kelgen
Ózgeden emes, ózegin jaryp shyqqan ulynan zábir kórgen qarııa amaly taýsylǵan soń Oblystyq prokýratýra janyndaǵy quqyq qorǵaý qyzmetiniń ortalyǵyna júginipti. Bankomattan zeınetaqy alatyn kartany ıemdenip alǵan azamat 2009 jyldan beri ákesin zar qaqsatyp kelgen. Ótinish negizinde zeınetkerdiń uly oblystyq prokýratýraǵa shaqyrylǵan. Quramynda prokýror, advokat, sot oryndaýshysy, medıator, psıholog jáne quqyqtyq statıstıka mamandary bar jumys tobymen kezdsken soń, azamat bankomat kartasyn ákesine qaıtaryp bergen. Ortalyq ókilderi sońǵy bir jyldyń ishinde ǵana túrli kómek surap 3000 adam júgingenin aıtady.
Jalpy 2018 jyly oblystyq prokýratýraǵa turǵyndardan 15 myń aryz túsken.
«Aryzdardy qaraý barysynda 2000 azamattyń quqyǵy qorǵaldy. Túsken aryzdardyń teń jartysy qylmystyq protsestiń sotqa deıingi tergeý máselelerine qatysty bolǵan. Odan keıingi kezekte sot sheshimderimen kelispeý týraly aryzdar tur. Ótinishter men aryzdardyń 40 paıyzy bizdiń quzyretimizden tys máselelerdi qamtyǵandyqtan, tıisti organdarǵa qaıtara joldandy» - deıdi oblystyq prokýratýranyń baspasóz qyzmetiniń basshysy Ásel Momynjanova.