ShQO turǵyny 60 jasqa kelgende ómirinde birinshi ret jeke kýálik aldy
ÓSKEMEN. QazAqparat - Shyǵys Qazaqstan oblysynyń turǵyny 60 jasqa kelgende alǵash ret jeke kýálik aldy, dep habarlaıdy QazAqparat Qylmystyq atqarý júıesi departamentiniń baspasóz qyzmetine silteme jasap.
Sottalǵan A. 2019 jyldan beri aýyr qylmys jasaǵany úshin Glýbokoe aýdanynyń probatsııa qyzmetiniń esebinde tur.
2019 jyly áıelin uryp, densaýlyǵyna aýyr zııan keltirgeni úshin 4 jylǵa bas bostandyǵy shektelgen.
«Osy ýaqytqa deıin 60 jastaǵy sottalǵanda týý týraly kýálik pen áskerı bıletten basqa, onyń jeke basyn kýálandyratyn qujat bolǵan joq, óıtkeni ol 2000 jyldardyń basynda 1975 jylǵy úlgidegi pasportyn joǵaltyp alǵan. 2020 jyldyń maýsym aıynda A. probatsııa qyzmetine júginip, qujat alýǵa kómek surady. Probatsııa qyzmetkerleri sottalýshynyń 1993 jyldan 2003 jylǵa deıin Reseı Federatsııasynda turǵanyn anyqtady. Osyǵan baılanysty ol Reseı konsýldyǵynan Reseı azamattyǵynyń bar-joǵy týraly anyqtama usynýǵa tıis boldy»,-deıdi ShQO boıynsha QAJ departamentiniń bastyǵy, polıtsııa polkovnıgi Janbolat Káletaev.
Alaıda anyqtama alý úshin 70 000 teńge mólsherinde memlekettik baj tóleý qajet edi. Onda ondaı aqsha joq.
«Probatsııa qyzmetkerleri «Adam quqyqtary jáne zańdylyqty saqtaý jónindegi Qazaqstandyq halyqaralyq bıýrosy» fılıalynyń qyzmetkerlerimen baılanys ornatty, olar memlekettik baj salyǵyn tóleýge kómektesti. Alaıda, koronovırýs ınfektsııasyna baılanysty anyqtama berý jáne alý protsesi ótken jyldyń qarashasyna deıin sozyldy. Sottalýshy A-dan Reseı azamattyǵynyń joqtyǵy týraly anyqtama alǵan kezde odan ári qujattar №5 nysandaǵy anyqtamany alý úshin kóshi-qon qyzmeti arqyly jiberildi. Osydan keıin 2020 jyldyń jeltoqsan aıynyń sońynda sottalýshynyń qujattary jeke kýálikti resimdeýge jiberildi», - dep túıindedi Djanbolat Káletaev.
«Maǵan jeke kýálik berildi, óte qýanyshtymyn. Endi resmı túrde jumysqa ornalassam da bolady, zeınetaqy ala alamyn. Men endi emhanaǵa tirkeýge turamyn, buryn JSN bolmaǵandyqtan tirkele almadym», - deıdi sottalýshy.
