ShQO turǵyndarynyń jartysyna jýyǵy halyq sanaǵynan ótti
Osydan bir aıdan astam ýaqyt buryn elimizde halyq sanaǵy bastalǵan bolatyn. 30 qyrkúıekke deıin sanaq tek onlaın rejımde ótkizildi. Qazirgi ýaqytta Shyǵys Qazaqstan jurtshylyǵynyń jartysyna jýyǵy sanaq suraqtaryna jaýap berip úlgergen. Bul jaıly búgin baspasóz brıfıngi barysynda Ulttyq statıstıka bıýrosynyń ShQO boıynsha departamentiniń basshysy Berik Terlikbaev málimdedi.
«Sanaqtan onlaın rejımde 657 myń turǵyn nemese aımaq halqynyń 48 paıyzy ótti. Respondentterdiń kóbisi sanaqqa telefon arqyly qatysqan. Bul kórsetkishte óńir boıynsha Semeı qalasy kósh bastap tur. Onda 113 myńnan astam azamat sanaqtan ótken. Ekinshi orynda – Óskemen (103 myń adam), úshinshi orynda – Úrjar aýdany (56 myń adam)», - dedi ol.
Berik Terlikbaevtyń aıtýynsha, sanaq júrgizý úshin 1 qazannan bastap turǵyn úılerdi aralaý bastaldy. Oblysta bul jumysqa 1215 adam qabyldanǵan. Onyń ishinde 180 nusqaýshy-baqylaýshy jáne 963 ıntervıýer bar.
