ShQO turǵyndarynan repressııaǵa ushyraǵan jaqyndary týraly aqparat jınastyrylýda

ÓSKEMEN. QazAqparat – Shyǵys Qazaqstan oblysynyń turǵyndarynan Keńes ýaqytynda saıası-qýǵyn súrginge ushyraǵan, aqtalmaı qalǵan jaqyndary týraly málimet surastyrylyp jatyr, dep habarlaıdy QazAqparat.

QR Prezıdentiniń 2020 jylǵy 24 qarashadaǵy № 456 Jarlyǵyna sáıkes, saıası qýǵyn-súrgin qurbandaryn tolyq aqtaý jónindegi Memlekettik komıssııa quryldy. Komıssıanyń bas maqsaty – keńes dáýiri kezeńiniń barlyq sanattaǵy saıası qurbandaryna qatysty tarıhı ádilettilikti qalpyna keltirý.

Shyǵys Qazaqstan oblysynyń Aqparattyq ortalyǵynan málim etkendeı, óńirde saıası qýǵyn-súrgin qurbandaryn tolyq aqtaý boıynsha óńirlik komıssııa jáne jumys toptary quryldy.

Sondaı-aq Elektrondyq qyzmetter ortalyǵynyń portalynda «Saıası qýǵyn-súrginniń aqtalmaǵan qurbandaryn izdestirý» bólimi ashyldy. Onda kez kelgen azamat Keńes dáýiri kezeńinde saıası ýáj boıynsha jazalanǵan jáne solardan zardap shekken aqtalmaǵan azamattar týraly aqparat qaldyra alady. Málimetter keıin Memlekettik komıssııanyń qaraýyna usynylady.

«Repressııaǵa ushyraǵan týǵan-týystary, túrli sebeptermen aqtalmaı qalǵan jaqyndary týraly tıisti aqparatqa ıe azamattardan málimetterdi atalmysh bólimge ornalastyrýdy suraımyz», - dedi ShQO Aqparattyq ortalyǵynan.

Illıýstratsııalyq foto