ShQO turǵyndaryna sý tasqyny kezinde qalaı áreket etý kerektigi túsindirildi

ÓSKEMEN. QazAqparat – Shyǵys Qazaqstan oblysynda qutqarýshylar óńir jurtshylyǵyna sý tasqyny kezinde qalaı áreket etý kerektigin túsindirdi, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, qutqarýshylar men «Qyzyl aı» qoǵamy oblystyq fılıalynyń eriktileri birlesip, sý tasqyny qaýpi bar aýyl turǵyndary úshin tótenshe jaǵdaı kezinde áreket etý erejeleri týraly sheberlik saǵatyn ótkizdi.

«Arnaıy uıymdastyrylǵan semınarda Veselovka kentiniń halqyna sý basqan kezde qaýipsiz oryndardy anyqtaýdy jáne arnaıy manekenniń kómegimen zardap shekkenderge alǵashqy medıtsınalyq kómek kórsetýdiń daǵdylaryn úıretti. Budan bólek, tótenshe jaǵdaı kezinde árbir áreketti aldyn ala josparlaý qajettigi túsindirildi. Sheberlik saǵatyn uıymdastyrýǵa jergilikti atqarýshy organ ókilderi qoldaý tanytty», - delingen habarlamada.

Sonymen qatar shara barysynda departament qutqarýshylary eldi mekenge arnaıy ákelingen motopompamen sý sorý jumystarynyń qalaı júrgiziletinin, arnaıy jabdyqtardyń qalaı qoldanylatyndyǵyn kórsetti. Osyndaı sheberlik saǵatyn Shyǵys Qazaqstannyń 10-ǵa jýyq aýylynda ótkizý josparlanyp otyr.