ShQO turǵyndaryna ınvestıtsııalyq joba usynǵan alaıaq 200 mln teńge paıda tapqan
ÓSKEMEN. QazAqparat – Shyǵys Qazaqstan oblysynyń turǵyndary alaıaqtyń arbaýyna iligip, 200 mln teńge shyǵynǵa batqan, dep habarlaıdy QazAqparat tilshisi.
ShQO polıtsııa departamenti baspasóz qyzmetiniń málimetine súıensek, tergeý basqarmasy alaıaqtyq faktisi boıynsha qylmystyq isti qaraýda. Kúdikti retinde Aıagóz qalasynyń 39 jastaǵy turǵyny ustalǵan. Anyqtalǵandaı, alaıaq jurtty ınvestıtsııalyq jobalardan paıda tabýǵa shaqyryp aldaǵan.
Osylaısha onyń arbaýyna 35 adam túsken. Jábirlenýshilerge kelgen materıaldyq shyǵyn mólsheri 200 mıllıon teńgeden asady.
«Qazirgi ýaqytta tártip saqshylary tergeý amaldaryn júrgizýde. Sonyń nátıjeleri boıynsha sońǵy protsessýaldyq sheshim qabyldanady», - dedi ShQO PD bastyǵynyń orynbasary Talǵat Shaıahmetov.
