ShQO turǵyndary jol boıynan jarylǵysh zat salynǵan qapshyqtar taýyp aldy
ÓSKEMEN. QazAqparat – Shyǵys Qazaqstan oblysynyń turǵyndary tasjoldardyń birinen jarylǵysh zat salynǵan qaptardy taýyp alǵan, dep habarlaıdy QazAqparat tilshisi.
22 shildede áleýmettik jelide Jańǵyztóbe-Aıagóz tasjolynyń mańynda túsirilgen vıdeo tarap ketti. Avtordyń aıtýynsha, ol jol jıeginde jatqan birneshe qapty baıqap qalǵan.
«Biz toqtap, sómkelerge taıaǵanda ań-tań boldyq. Olardyń syrtynda «jarylǵysh zat» dep jazylyp tur eken. Qasynda «elektr toǵynsyz jarý júıesi» degen jazýy bar qoraptardy baıqadyq. Bul degen sumdyq qoı!», - deıdi ol.
ShQO Polıtsııa departamenti baspasóz qyzmetiniń málimetine súıensek, bul vıdeo Jarma aýdanynyń aýmaǵynda túsirilgen. Qazirgi ýaqytta atalǵan ýchaskede jóndeý jumystary júrgizilýde.
«Anyqtalǵandaı, jarylǵysh zattar jol tósemesin salý úshin sol jerge jetkizilgen. Ony jarý jumystaryn júrgizetin JShS ókilderi ákeldi. Polıtsııa qyzmetkerleri atalǵan ýchaskede kezekshilik etýde. Turǵyndarǵa tónip turǵan esh qaýip joq», - dep habarlady vedomstvo ókilderi.
