ShQO turǵyndary zaýyttardyń aýany qanshalyqty lastaǵanyn telefon arqyly bilip otyrady

ÓSKEMEN. QazAqparat – Shyǵys Qazaqstan oblysynyń turǵyndary iri kásiporyndardyń zııandy shyǵaryndylary týraly aqparatty telefon arqyly bilip otyrady, dep habarlaıdy QazAqparat tilshisi.

ShQO ekologııa departamenti baspasóz qyzmetiniń málimetine súıensek, óńirdegi iri kásiporyndardaǵy shyǵaryndylar týraly aqparatty onlaın rejımde berip otyratyn datchıkter ornatý josparlanǵan.

Sonyń nátıjesinde turǵyndar aýaǵa shyǵarylatyn zııandy zattar týraly aqparatty ınternette óz betinshe baqylaı alady.

«Jańa ekologııalyq kodekske sáıkes, birinshi sanattaǵy barlyq iri sýbektiler 2023 jyldyń 1 qańtarynan bastap óz qubyrlarynda ekologııalyq baqylaý júıesin engizýge mindetti. Halyq ár qubyrdaǵy shyǵaryndylar týraly aqparatty smartfonmen onlaın rejımde kóre alady. Eger zııandy shyǵaryndylar ruqsat etilgen shekten asyp ketse, kásiporyn tıisti shara qoldanýǵa mindetteledi», - deıdi departament basshysy Danııar Álıev.

Sondaı-aq datchıkter aqparatty Ekologııa, geologııa jáne tabıǵı resýrstar mınıstrligi men jergilikti ákimdikke joldap otyrady.