ShQO turǵyndary shekten tys aýyr júk tıegen kólikterge shaǵymdana alady
Inspektsııa basshysy Kenjebek Muqashevtyń aıtýynsha, óńirdegi joldardyń jıi búlinýine asa aýyr salmaqtaǵy júk kólikter sebepker. Oblys boıynsha memlekettik tirkeýge alynǵan 5900 júk kóliginiń 728-i osy sanatqa kiredi. Olardyń bárin qadaǵalaýǵa óńir boıynsha jumys isteıtin 2 jyljymaly keshen jetkiliksiz. Osy sebepti ınspektsııa basshysy Kenjebek Muqashev óziniń Facebook paraqshasy arqyly turǵyndardan kómek surady.
«2015 jyldan beri Qazaqstan aýmaǵynda jalpy qoldanysqa arnalǵan avtomobıl joldarynda aýyr salmaqty samosvaldardyń júrýine tyıym salynǵan. Joldardy kútip ustaý úshin sondaı sheshim qabyldanǵan. Óńirdegi kólik qatynasyna beıjaı qaramaıtyn kez kelgen shyǵysqazaqstandyq bul iske atsalysa alady. Ol úshin 8-701-203-00-59 nómiri arqyly ınspektsııa basshysyna, 8-705-441-68-52 nómiri arqyly ınspektsııa basshysynyń orynbasaryna habarlasýǵa bolady. Al Whats App, Telegram jelilerine +7 708 0880800 nómiri arqyly málimet bere alasyzdar» delingen hbaralamada.
Shyǵystaǵy asfalt joldardyń barlyǵy keńes zamanynda salynǵan. Sol kezdegi talap boıynsha tóselgen asfalt jolǵa jalǵyz bilikten 3,5 tonna, al qosar bilikten 6 tonna salmaq túsýi tıis dep qarastyrylǵan.
«Qazirgi tańda bul talaptarǵa baǵynbaıtyn sheteldik aýyr kólikter qaptap júr. Biri shekaradan taýar tasysa, endi biri túrli karerden taý jynystary men ken tasıdy. Qarastyrylǵan tártip boıynsha mundaı tehnıkalar asfalt jolǵa paralel tóselgen tehnıkalyq joldarmen júrýi tıis. Másele osy talaptardyń saqtalmaýynan týyndap otyr. Jyl basynan beri karerden ken shyǵarý kezinde talaptardy oryndamaı, salmaq asyrǵany úshin kólik ıelerine 7 mln. teńge aıyppul salyndy. Dál osyndaı bassyzdyq úshin tasymaldaýshylarmen qatar 11 júk jóneltýshi ákimshilik jaýapqa tartylyp, 1 mln. teńgeden astam aıyppul salynyp, memleket paıdasyna tústi», - deıdi Kenjebek Muqashev.
