ShQO turǵyndary polıtsııaǵa 150-den astam atys qarýyn ótkizdi
ÓSKEMEN. QazAqparat – Shyǵys Qazaqstan oblysynyń turǵyndary polıtsııaǵa tirkeýge alynbaǵan 159 atys qarýyn ótkizdi, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, 2014 jyldan bastap jyl saıyn el aýmaǵynda halyqtan zańsyz saqtalǵan atys qarýyn, oq-dáriler men jarylǵysh zattardy erikti túrde satyp alý aktsııasy ótkiziledi. Bıyl atalmysh shara 1 sáýirde bastalǵan bolatyn.
«Tirkelmegen qarýdy nemese oq-dárilerdi ishki ister organdarynyń bólimshesine tapsyrǵan azamattarǵa aqshalaı syıaqy berilýde. Aktsııa bastalǵaly osy ýaqytqa deıin jalpy somasy 9 mıllıon teńgeden asatyn 159 qarý qabyldandy. Túri men sanatyna baılanysty qarýdyń bir danasy úshin tólem somasy 10-nan 50 AEK-ke deıin, al aqshaǵa shaqqanda 29 000-nan 145 myń teńge mólsherin quraıdy. Osy baǵyttaǵy jumystar aldaǵy ýaqytta da jalǵasyn tabady», - dedi ShQO PD bastyǵy Saǵat Mádıev.
Máselen, «102» jedel arnasyna habarlasqan áıel adam ózine muraǵa qalǵan saıajaıda jóndeý jumystaryn júrgizý barysynda myltyqqa uqsas zat taýyp alǵanyn aıtty. Ol qarýdy polıtsııa qyzmetkerlerine ótkizdi. Tıisti saraptamalar júrgizilgennen keıin áıelge aqshalaı syıaqy berilmek.
