ShQO turǵyndary ozyq medıtsınalyq kómekti shetelge shyqpaı-aq ala alady
ÓSKEMEN. QazAqparat - Óskemendegi Ana men bala ortalyǵynyń materıaldyq-tehnıkalyq bazasy AQSh, Japonııa, Germanııa, Úndistan, Avstrııa elderinde shyǵarylǵan ozyq úlgidegi jabdyqtarmen tolyǵýda, dep habarlaıdy QazAqparat tilshisi.
Atalmysh densaýlyq mekemesine oblys ortalyǵymen birge 11 aýdan bekitilgen.
Óńir basshysy Danıal Ahmetov ortalyqqa alynǵan zamanaýı jabdyqtardyń jumysymen tanysty. Mamandardyń aıtýynsha, jańadan alynǵan quraldar eń kúrdeli degen emdik protsedýralardy álemniń úzdik emhanalaryna barmaı-aq, osynda jasaýǵa múkindik beredi.
Sońǵy 2 jyl ishinde atalmysh ortalyqqa AQSh, Japonııa, Germanııa, Úndistan, Avstrııa elderinde jasalǵan sońǵy úlgidegi joǵary tehnologııalyq medıtsınalyq jabdyqtar ornatyldy. Tek ótken jyly oblys qazynasynan bólingen qarajatqa 45 zamanaýı qural-jabdyq alynǵan. 
Endi ortalyqta jańa týǵan nárestelerge tolyq qamqorlyqty qamtamasyz etetin neonataldyq tósekaldy monıtor, LOR otalaryn jasaýǵa arnalǵan beıneendoskopııalyq keshen, ıntensıvti ınkýbator, S-doǵaly ınvazıvti emdik apparat, kompıýterlik tomografııa kabıneti men kóz mıkrohırýrgııasy kesheni jumys isteıdi.
«Ortalyq mamandary osy jańa múmkindikterdi tıimdi paıdalana bilýi tıis. Ol úshin medıtsınadaǵy ozyq tehnologııalardy der kezinde ıgerip, biliktilik daǵdylaryn arttyryp otyrý qajet. Sebebi, bul mamandarǵa elimizdiń eń qundy baılyǵyn - balalardy tapsyryp otyrmyz» - dedi Danıal Ahmetov. 
Aıta keteıik, byltyr ortalyqtyń bas dárigeri bastaǵan 10 dáriger Anglııada bilikterin arttyryp kelgen-di. Bıyl taǵy 20 mamandy oqytý josparlanyp otyr.
