ShQO turǵyndary on kúnde 7 myńnan astam ret jol erejesin buzdy
ÓSKEMEN. QazAqparat – Shyǵys Qazaqstan oblysynyń turǵyndary on kúnde 7 myńnan astam ret jol erejesin buzdy, dep habarlaıdy QazAqparat tilshisi.
ShQO Polıtsııa departamenti baspasóz qyzmetiniń málimetine súıensek, óńir aýmaǵynda 21-31 shilde aralyǵynda «Qaýipsiz jol» jedel aldyn alý sharasy ótkizildi. Mundaǵy maqsat – jol-kólik oqıǵalaryn azaıtý, ereje buzýshylardy jaýapqa tartý jáne halyqqa túsindirý jumystaryn júrgizý.
Shara bastalǵaly ásirese túngi ýaqytta kóshedegi patrýldik polıtseılerdiń sany arttyryldy. Mas kúıde kólik tizgindeý, ruqsat etilmegen jerde basqa kólikti basyp ozý, qarsy jolaqqa shyǵyp ketý, manevr jasaý erejelerin saqtamaý syndy ereje buzýshylyqtarǵa erekshe nazar aýdaryldy.
«On kún ishinde 7 240 jol erejesin buzý faktisi anyqtaldy. Atap aıtqanda, mas kúıde kólik quralyn basqarý - 46, kólik tizgindeý kezinde telefon paıdalaný – 701, qaýipsizdik beldigin taqpaý - 1250, manevr jasaý erejelerin buzý - 824. Sonymen qatar 106 avtokólik arnaıy turaqqa qoıylyp, 94 kóliktiń memlekettik tirkeý nómiri alyndy», - delingen aqparatta.
