ShQO turǵyndary MÁMS aıasynda medıtsınalyq kómekke jıi júgine bastady
«Áleýmettik medıtsınalyq saqtandyrý qory» ShQO fılıaly baspasóz qyzmetiniń málimetine súıensek, byltyr óńir halqy syrqattanyp, emhanalarda 4,4 mln ret em qabyldaǵan.
Konsýltatsııalyq-dıagnostıkalyq qyzmetter sany bir jylda 55% artyp otyr.
«Táýlik boıy jumys isteıtin statsıonarlarda 143 myń, kúndizgi statsıonarlarda 70 myń, statsıonarlardyń qabyldaý bólimshelerinde 165 myńnan astam naýqasqa medıtsınalyq kómek kórsetildi. Búginde oblys boıynsha MÁMS aıasynda qyzmet kórsetetin medıtsınalyq uıymdardyń ishinde jeke menshik – 46, memlekettik – 61», - delingen aqparatta.
Aıta keteıik, azamattar MÁMS júıesi týraly qandaı da bir saýaldary bolsa qordyń fms.kz resmı saıtyna, Qoldau 24/7 mobıldi qosymshasyna jáne 1406 baılanys ortalyǵyna júgine alady.
