ShQO turǵyndary mal urlyǵyna alańdaýly
ÓSKEMEN. QazAqparat - Shyǵys Qazaqstannyń Ulan aýdanynda aýyl shetinen jylqy atyp júrgen qylmystyq top ustalǵan bolatyn. Ury ustalǵanmen, turǵyndar áli alańdaýly, dep habarlaıdy QazAqparat tilshisi.
Jyl basynan beri Mamaı batyr, Saǵyr, Baıash Ótepov aýyldarynda malǵa qarý kezenetin urylar paıda bolǵan. Aınaldyrǵan eki aptanyń ishinde úsh aýyldan tórt bıe atylypty. Ásirese Mamaı batyr aýylynyń turǵyny Asylbek Zeınollaulynyń malyna qyrǵıdaı tıip júr.
«Byltyr jazda 11 bas sıyrym aýyl shetinen urlanǵan bolatyn. Qańtardyń basynda eki bıemdi atyp áketti. Sonda bir jylda 13 bas maldan kóz jazyp otyrmyn. Bir apta buryn taǵy bir bıeni oqqa baılap, ishtegi qulyny men ókpesin tastap ketken bolatyn. Endigisi mynaý. Bul da týaıyn dep turǵan bolatyn. Qansyrap jatyp óldi» - deıdi mal ıesi.
Bıe qulaǵan mańnan gılza tabylǵanmen, myltyq tabylmapty. Turǵyndardy sol alańdatyp otyr.
«Aldynan polıtsııa shyqqanda qaraqshylar tura qashqan desedi. Sol kezde bireýi sytylyp ketti me degen qaýpimiz bar. Onda myltyq sonyń qolynda ketti degen sóz. Aýyl shetine kelip mal atýdan taıynbaǵan qanypezerler erteń úıimizge kelip ózimizdi atpasyna kim kepil? Qazir malǵa jalǵyz-jarym shyǵýdan da qaldyq. Toptanyp baryp júrmiz» - deıdi Asylbek.
Taý arasynda ońasha otyrǵan Berdimurat Súıenishtiń otbasy da osyndaı úreıdiń qushaǵynda júr.
«Eki at kóktemde urlanǵan bolatyn. Al bıemdi qańtardyń alǵashqy kúnderi atyp áketti. Polıtsııaǵa aryz bergenbiz. Sońǵy bıeni urlaǵanyn ǵana moıyndapty. Al kóktemde joǵalǵan eki attyń izi áli ashylǵan joq. Ury ábden basynyp aldy. Bir shyqqanda Baıash Ótepov aýylynan bir bas, Saǵyr aýylynan eki bas, Mamaı batyr aýylynan bir bas jylqy atyp alǵan. Adal eńbegimen jan baǵyp otyrǵan halyqty bulaısha basynýǵa bola ma» - deıdi Berdimurat Súıenish.
Oblystyq polıtsııa departamenti osy oqıǵaǵa baılanysty resmı aqparat taratty.
«Jergilikti turǵyndardan jaıylymda júrgen jylqysy joǵalǵany týraly 3 aryz túsken bolatyn. Jalpy shyǵyn mólsheri - 1,3 mln teńge. Búginde osy urlyqqa qatysy bar úsh adam anyqtaldy» - delingen.
Polıtsııa kúdiktilerdiń sanyn úsheý ǵana dese, aýyl turǵyndary tórt adam ustaldy dep otyr. Olardyń ústinen QR Qylmystyq kodeksiniń 188 baby boıynsha tergeý júrip jatyr.
«Bizge tórt adam ustaldy dep aıtyldy. Onyń bireýi Saǵyr aýylynyń turǵyny eken. Qalǵan úsheýi Tarbaǵataı aýdanynyń týmalary dep estidik. Shyǵyn kólemi 1,3 mln teńge degenderimen de kelispeımin. Jalǵyz meniń shyǵynym bir mıllıon teńgeden asady. Ony aryzda naqty jazyp kórsetkenmin» - deıdi Berdimurat Súıenish.
Turǵyndar urylarǵa taǵylyp otyrǵan aıyptyń tym jumsaq ekenin aıtady.
«Mal atqan qarýdyń qaıda ketkeni túsiniksiz bolyp tur. Qolymyzda mal soıǵan mańnan tabylǵan gılzalar bar. Bir oq sońǵy atylǵan bıeniń etinen shyqty. Sol arqyly-aq myltyqtyń markasyn anyqtaýǵa bolady ǵoı. Urlanyp kelip soısa, jaı ǵana urlyq dep aıtýǵa bolar edi. Al bular kóp-kórineý myltyq atyp, ses kórsetip júr. Qaraqshylyqtan nesi kem? Sondyqtan áreketterine saı jaza alǵanyn qalaımyz» - deıdi Asylbek Zeınollauly.
Bul saýaldy oblystyq polıtsııa departamentine qoıǵan edik.
«Naqty ustalǵan úsh adam. Turǵyndar aıtyp otyrǵan tórtinshi adam kýáger retinde nemese de basqa da jaǵdaıda iske tartylýy múmkin. Al qandaı qarýdan oq atylǵanyn saraptama anyqtaıdy. Ol qarýdyń qaıda ekenin tergeý júrip jatqandyqtan aıtýǵa bolmaıdy» - deıdi departamenttiń baspasóz qyzmetiniń basshysy Aıgerim Nurǵazına.
