ShQO turǵyndary bir jylda 113 myń tonna sút tapsyrǵan
ÓSKEMEN. QazAqparat - Shyǵys Qazaqstan oblysynyń turǵyndary sút qabyldaý beketterine 113 myń tonna sút quıǵan. Osylaısha jergilikti sút zaýyttary qajetti shıkizatpen 75 paıyz qamtylyp otyr, dep habarlaıdy QazAqparat tilshisi.
Bul týraly ákimdik májilisinde oblys basshysy Danıal Ahmetov aıtty.
«2015 jyly sút zaýyttarynyń shıkizatpen qamtylýy 29 paıyz ǵana bolatyn. Úsh jyldyń ishinde 75 paıyzǵa jetip otyr. Halyq 113 myń tonna sút tapsyrǵan. Mine, osyndaı naqty nátıjeler qajet. Endi halyqtyń qolyndaǵy maldyń sany men tapsyrylǵan súttiń teńgerimine taldaý jasaý kerek. ıAǵnı, sút zaýyttary basymdyqty sharýa qojalyqtarǵa emes, qarapaıym turǵyndarǵa berýi tıis. Sút qabyldaıtyn beketter halyq úshin qoıylyp jatyr» - dedi Danıad Ahmetov.
Atalmysh májiliste aýyl sharýashylyǵyna qatysty ózge de ózekti máseleler talqylandy. Byltyr Shyǵys Qazaqstanǵa syrttan 10 myń bas sıyr ákelinýi kerek bolǵan. Onyń ornyna 3,2 myń bas qana jetkizilgen. Besqaraǵaı, Borodýlıha, Katonqaraǵaı aýdandary bir bas ta mal satyp almaǵan.
Oblys boıynsha 9500 basqa arnalǵan bes bordaqylaý alańy salynýy tıis edi. Onyń ornyna 6000 bastyq úsh alań salynǵan. Jalpy óńirdegi mal bordaqylaý alańdaryna bir jyldyń ishinde 34800 bas iri qara qoıylý kerek bolǵan. Naqty nátıje 25 myń bas qana. Áıtse de, bul kórsetkish jóninen bizdiń oblys 75 paıyzdyq kórsetkishpen respýblıka boıynsha kósh bastap tur. Aıagóz, Jarma, Kókpekti, Kúrshim, Úrjar, Shemonaıha aýdandary men Semeı qalasy sylbyrlyq tanytpaǵanda bul mejeni 100 paıyz oryndaýǵa da bolar edi.
Agroónerkásipti damytýdyń 2017-2022 jyldarǵa arnalǵan baǵdarlamasy boıynsha bıyl bizdiń oblys 1000 tonna sıyr etin eskporttaýy tıis bolatyn. Onyń ornyna 272 tonna et satylǵan. Halyqaralyq epızotıkalyq bıýronyń Shyǵys Qazaqstan oblysyn aýsylǵa beıim óńir dep tanýy Reseıge et satýǵa kedergi keltirse kerek. Sonyń kesirinen bizdiń et Ózbekstanǵa eksporttalǵan.
Taýarly sút fermalaryn salý jospary da júz paıyz oryndalmapty. 1250 oryndyq segiz fermanyń ornyna 950 oryndyq alty nysan ǵana boı kótergen. Bıyl burynǵylardyń ústine 15 sút qabyldaý beketin qoıý josparlanǵan bolatyn. Naqty nátıje - 13 beket. Katonqaraǵaı jáne Kúrshim aýdandary moıynǵa alǵan mindetterin orta jolda qaldyryp otyr.
