ShQO turǵyndary beıbereket tókken 226 qoqys úıindisi anyqtaldy
ShQO Ekologııa departamenti baspasóz qyzmetiniń málimetine súıensek, óńir boıynsha beıbereket tógilgen 226 qoqys úıindisi anyqtaldy. Qazirgi ýaqytta onyń 128-i joıyldy. Al 98 jerde qoqystan tazartý áli júrip jatyr.
«Osyndaı úıindilerdiń paıda bolý sebebi – aýyldy jerlerde qaldyqtardy basqarý júıesiniń joqtyǵy, sonyń ishinde qaldyqtardy jınaý jáne shyǵarý pýnkteriniń bolmaýy. Jyl saıyn quzyrly memlekettik mekemeler jáne qoǵamdyq uıymdar lastanǵan tabıǵı aýmaqtardy tazartý maqsatynda senbilikter ótkizedi. Alaıda bul másele 30 jyldan beri túpkilikti sheshimin tappaı keledi», - delingen aqparatta.
Vedomstvo ókilderiniń dereginshe, Shyǵys Qazaqstan oblysy boıynsha qaldyqtardy basqarý baǵdarlamasyn qurý qajet.
«Birneshe aýyldyq okrýgte bir uıym qaldyqtardy shyǵarýmen aınalysýy kerek. Buryn bul jumysty kommýnaldyq qyzmetter atqarsa, qazir ony memlekettik-jekemenshik áriptestik aıasynda iske asyrýǵa bolady», - delingen habarlamada.