ShQO turǵyny separatızm úshin 5 jylǵa sottaldy

Shyǵys Qazaqstan oblysy Altaı aýdanynyń turǵyny separatızm úshin 5 jylǵa sottaldy, dep habarlaıdy Kazinform.

Altaı aýdandyq sotynda qaralǵan sot isiniń materıaldarynan belgili bolǵandaı, áıel adam Instagram áleýmettik jelisinde jarııalanǵan Lenın eskertkishi qulaǵan vıdeoǵa pikir qaldyrǵan. Onda «Erte me, kesh pe Shyǵys Qazaqstan Reseı quramyna qosylady» dep jazdy.

«ShQO-da týyp, osy jerde turyp jatqanyna qaramastan separatıstik tanytqan 43 jastaǵy aıyptalýshy sot barysynda óz kinásin tolyqtaı moıyndady. Solaı jazǵanyna ókinetindigin aıtyp, keshirim surady», - delingen úkimde.

Sot sheshimimen áıel QR QK-niń 180-baby 2-bóligimen kináli dep tanylyp, 5 jylǵa bas bostandyǵynan aıyryldy. Alaıda kámeletke tolmaǵan balasy bary eskerilip, jazany oryndaý merzimi bes jylǵa keıinge shegerilgen. Úkim áli zańdy kúshine engen joq.