ShQO turǵyny saıası qýǵyn-súrgin qurbanynyń balasy retinde tanyldy

ASTANA. KAZINFORM — Shyǵys Qazaqstan oblysynyń Glýbokoe aýdandyq soty 1937–1956 jyldar aralyǵyndaǵy saıası qýǵyn-súrginnen zardap shekken dep taný týraly zańdyq mańyzy bar faktini belgileý jónindegi azamattyń ótinishin qanaǵattandyrdy.

Vedomstvonyń baspasóz qyzmeti málim etkendeı, ótinish berýshi 1953 jyly ata-anasy Qıyr Shyǵystan Qyzylorda oblysyna kúshtep qonys aýdarylǵannan keıin Óskemen qalasynda dúnıege kelgenin alǵa tartqan. Bul faktini belgileý oǵan arnaıy memlekettik járdemaqy alý úshin qajet bolǵan.

Sotqa usynylǵan materıaldarda ótinish berýshiniń ápkesi ata-anasymen birge arnaýly qonystanýda bolǵany kórsetilgen. Al prokýratýra ákesine qatysty muraǵattyq málimetterdiń bolmaýy týraly anyqtama bergen.

Qazaqstan Respýblıkasynyń «Jappaı saıası qýǵyn-súrginder qurbandaryn aqtaý týraly» Zańyna sáıkes, saıası qýǵyn-súrgin qurbandary retinde KSRO-nyń joǵarǵy memlekettik organdarynyń sheshimderimen Qazaqstanǵa nemese Qazaqstannan zańsyz kúshtep qonys aýdarylǵan azamattar tanylady. Sonymen qatar, osyndaı qýǵyn-súrginge ushyraǵan azamattardyń balalary da saıası qýǵyn-súrgin qurbany mártebesine ıe bola alady.

— Sotta ótinish berýshiniń ákesi 1937 jylǵy 21 tamyzdaǵy KSRO BK (b)P OK men KSRO HKK-niń qaýlysy negizinde Qıyr Shyǵys óńirinen Qazaqstanǵa kúshtep kóshirilgeni belgili boldy. Bul derek onyń eńbek kitapshasyndaǵy jazbalarmen de rastalǵan. Atalǵan zańdyq fakt járdemaqy alý quqyǵyn resimdeý úshin mańyzdy bolǵandyqtan, sot ótinishti qanaǵattandyrdy. Qazir sot sheshimi zańdy kúshine engen joq, — delingen habarlamada.

Budan buryn Jeltoqsan kýágeri 64 jastaǵy aqtóbelik aqtalyp, saıası qýǵyn-súrgin qurbany dep tanylǵanyn jazǵan edik.