ShQO turǵyny ǵasyrdan astam tarıhy bar qarýdy polıtsııaǵa tapsyrdy
ASTANA. KAZINFORM — Zańsyz saqtalǵan qarýdy aqyly negizde qabyldaý aktsııasy aıasynda polıtsııaǵa 1900 jyly shyǵarylǵan, sırek kezdesetin «Braýnıng» júıesindegi tapansha tapsyryldy, dep habarlaıdy Polisia.kz.
20 sáýirden bastap Shyǵys Qazaqstanda atys qarýyn, oq-dáriler men jarylǵysh zattardy óz erkimen tapsyrý boıynsha respýblıkalyq aktsııa jalǵasyp jatyr. Oblys turǵyndary naýqanǵa belsendi qatysyp keledi: búgingi tańda polıtsııa bólimshelerine 49 atys qarýy óz erkimen ótkizildi. Ádettegi ańshy myltyqtarynyń ishinen sarapshylardyń erekshe nazaryn 1900 jylǵy úlgidegi ańyzǵa aınalǵan «Braýnıng» júıesindegi ózdiginen oqtalatyn tapansha (kalıbri 7,65 mm) aýdardy. Bul — áıgili qarý-jaraq sheberi Djon Mozes Braýnıng jasaǵan, álemdegi alǵashqy serııaly ózdiginen oqtalatyn tapanshalardyń biri.
— Tapansha sot-ballıstıkalyq saraptamadan ótti, onyń aqaýsyz ekeni rastaldy. Qarýdyń kóneligine qaramastan, ol óz jaýyngerlik qasıetin saqtap qalǵan. Mamandar hımııalyq óńdeý ádisimen serııalyq nómirdiń bir bóligin qalpyna keltirýge qol jetkizdi, — dep atap ótti ShQO polıtsııa departamentiniń krımınalıst sarapshylary.
Polıtsııa zańsyz saqtalǵan qarýdy óz erkimen tapsyrý — ony zańdastyrýdyń nemese qaýipti zattan jaýapkershiliksiz qutylýdyń eń ońtaıly joly ekenin eske salady. Qarýdy óz erkimen tapsyrǵan azamattar, eger olardyń is-áreketinde ózge de qylmystyq quqyqbuzýshylyqtardyń belgileri bolmasa, qylmystyq jáne ákimshilik jaýapkershilikten tolyq bosatylady.
Budan buryn Qazaqstanda qarý-jaraqty ákelý men áketýge qoıylatyn talaptar ózgergenin jazǵanbyz.
