ShQO turǵyny ekologııalyq kýálikten bas tartý týraly sheshimdi sot arqyly zańsyz dep tanytty

ÓSKEMEN. KAZINFORM – Shyǵys Qazaqstan oblysy Glýbokoe aýylynda turatyn áıelge ekologııalyq qaýipti aımaqta turǵanyn rastaıtyn kýálikti berýden bas tartqan ýákiletti organnyń áreketi sot arqyly zańsyz dep tanyldy.

Bas tartý sebebi tıisti qujattardyń bolmaýy dep kórsetilgen.

- Alaıda «Semeı ıadrolyq synaq polıgonynda júrgizilgen ıadrolyq synaqtardyń saldarynan zardap shekken azamattardy áleýmettik qorǵaý týraly» Zańǵa sáıkes, 1966 jyldan 1990 jylǵa deıingi aralyqta jerasty ıadrolyq jarylystary júrgizilgen aýmaqtarda turǵan, jumys istegen nemese áskerı qyzmet ótkergen azamattar zardap shekkender retinde tanylady. Mundaı azamattarǵa jeńildikter men ótemaqylar alýǵa quqyq beretin arnaıy kýálikter beriledi, - dep habarlady Glýbokoe aýdandyq sotynan.

Sot isti qarap, talapkerdiń 1990 jyly segiz aı boıy Beloýsovka kentinde turǵanyn rastaıtyn jetkilikti dálelder bar degen sheshimge keldi. Bul eldi meken radıatsııalyq qaýipti aımaq retinde tanylǵan.

- Sot talapkerdiń 1990 jyly Semeı ıadrolyq synaq polıgonynyń yqpal etken aımaǵynda segiz aı turǵanyn zańdy dep taýyp, talap-aryzdy qanaǵattandyrdy, - delingen úkimde.

Eske salsaq, osyǵan deıin SQO-da medbıke eki balanyń ólimine qatysty sottalǵany habarlanǵan.