ShQO turǵyny 30 jyldan astam ýaqyt esh qujatsyz ómir súrgen

ÓSKEMEN. KAZINFORM — Shyǵys Qazaqstan oblysynyń turǵyny 30 jyldan astam ýaqyt boıy esh qujatsyz júrgen.

ShQO polıtsııa departamentiniń málimetine súıensek, Tarbaǵaı aýdanynyń 56 jastaǵy turǵyny otyz jyldan astam ýaqyt boıy óziniń jeke basyn rastaıtyn qujatsyz júrgen.

Onyń týý týraly kýáligi bolǵan, biraq ata-anasynyń ekeýinen de erte aıyrylǵan soń qujattaryn ýaqytyly retteıtin eshkim bolmaǵan.

Al kámelet jasyna tolǵannan keıin qujattardy resimdemeı júre bergen.

«Polıtseıler er adamǵa qajetti qujattardy jınaýǵa kómektesip, týý týraly kýáliktiń telnusqasyn jasatty. Sonymen qatar onyń KSRO ydyraǵannan keıin eshbir eldiń azamattyǵyn almaǵany anyqtaldy. Barlyq qajetti qujatty jınaǵannan keıin kóshi-qon qyzmetiniń mamandary aýyl turǵynyna Qazaqstan Respýblıkasy azamatynyń alǵashqy jeke kýáligin tabys etti», — delingen aqparatta. 

Endi Tarbaǵaı aýdanynyń turǵyny áleýmettik jáne medıtsınalyq qyzmetterdi esh qıyndyqsyz alyp, zeınetaqy qoryna tirkele alady.

Jyl basynan beri Shyǵys Qazaqstan polıtseıleri osyndaı jaǵdaıǵa tap bolǵan 28 azamatqa kómektesken.